Kilometro 35

Gula 74

Nakatugkad ko sa lintunganay sa pangutana ni Fernan, ang lider sa mga vigilante. Gusto niyang pangayoon ang akong opinyon kun unsay buhaton namo ni Keith human kini makatug-an nga wala kini moapil paglugos nako ug gani giluwas pa niini ang akong kinabuhi gikan sa tino nga kamatayon pinaagi sa pagkarga nako sa usa ka gakit imbes nga itambog ko sa suba segun sa sugo ni Sheldon aron ako mamatay.

“Kun di ninyo ikahasol,” giingnan ko si Fernan,” gusto unta ko nga magpabilin siya dinhi uban kanato.”

“Di kaha siya makabulilyaso sa atong kalihokan?” Sukit ni Fernan.

“Nagtuo kong dili. Pero kun magkinaunsa man, akoy manubag ninyo kun maghimo siya’g binuang.”

“Misalig ka na gyud diay kaniya sa hingpit?”

“Di sa ingon niana. Gusto ko lang nga mapamatud-an ang iyang kaligdong. Mipasalig man siya nga motabang nako sa pagpanimalos kang Sheldon.”

“Maayo hinuon kun mao kana. Buyno, pakigsultihan ko una si Keith. Pagkahuman, modesisyon na ko kun mosugot ba ko sa imong gihangyo nga magpabilin siya dinhi uban kanato.”

“Ikaw ang mag-igo, Fernan.”

Human sa among panagsulti, gitawag ni Fernan ang usa sa iyang mga sakop. Gimandoan niya kini sa paghatod og pagkaon ngadto kang Keith ug ingon man pagtambal sa mga samad ug bun-og niini.

Nianang pagkagabii, nasigpatan ko si Bredhart nga migawas sa iyang lawak. Migawas siya sa balay. Gisundan ko siya nga mipaingon sa hardin aron magpahayahay. Nagkasultihanay ming duha.

“Salamat sa imong pagdala kang Keith dinhi,” giingnan ko siya.

“Way sapayan, Sandra,” tubag ni Bredhart.

Unya misantop sa akong hunahuna ang pag-seduce kang Bredhart. -- Sumpayan pa