Ang anting-anting ni Tiyo Boy

Usa ka sundalo si Tiyo Boy. Nasakop sa 63rd IB sa Philippine Army ug nadestino sa Mindanao. Magduawan lang siya sa iyang pamilya dinhi sa Sugbu matag tulo ka buwan.

Magkinse ka tuig na siya sa serbisyo ug nabalhin-balhin na lang sa nagkalain-laing dapit sa Mindanao apan wa gyud siyay tatsa sa lawas inagian og bala sa ilang mga kaaway.

"Biliba nako nimo Tiyo oy. Wa man gyud ka masamdi bisan tapsing na lang sa bala sa inyong maengkwentro didto sa Mindanao," matud ko kang tiyo Boy usa ka adlaw niana nga nagkita mi sa iyang pagpauli dinhi sa Sugbu aron mag-R and R kon rest and recreation leave.

"Kalooy sa Diyos, Senyo wa pay kontra namo nga nakasamad nako sa among mga engkwentro. Duna man sad gud koy gisul-ob nga panagang para mosimang ang bala."

"Mao ba? May anting-anting diay ka tiyo? Pwedeng tan-awon? Di bitaw ko manabi, honest pa," pasalig ko sa akong uyoan aron ko pakit-on sa iyang panagang sa bala.

"Kay ikaw man ang pinakasuod kong pag-umangkon, tug-anan tika ug mosalig kong di ka manulti sa ubang tawo, ha?"

"Makasalig ka Tiyo," nako pa nga mahinamong mahibawo sa iyang sekreto.

May gikuot siya sa iyang bulsa ug gikuha gikan sa iyang pitaka ang usa ka gamay'ng libretang itom. Usag tunga sa pulgada ang gitas-on ug usa ka pulgada ang gilapdon. Nipis ra kini, tingali mga napu ka pahina.

"Hinatag kini sa usa ka tiguwang lalaki nga among nasugatan samtang nagpatrolya kami sa kakahoyan sa usa ka barangay didto sa Basilan. Nangayo siyag pagkaon kanako ug kini ang iyang gihatag isip balus sa akong kaayo kaniya. Basahon ko kini matag gabii sa dayon kong katug. Bag-ohay pa kong nadestino sa Mindanao niadtong higayona." Pahayag sa akong uyoan.

"Mao diay nang hinungdan nga di ka masamdan sa imong kontra Tiyo?"

"Mao gyud. Tungod niini mosimang ang mga bala sa among kontra. Mao man gani nga kun duna mi lakaw, way magpaduol nako kay mosimang man ang bala ug sila nga naa sa akong duol maoy maigo."

Wa na mi magkita si tiyo Boy gikan niadto kay may gi-follow up siya sa Manila ug wa magdugay mibalik sa Mindanao.

Milabay ang duha ka tuig, ug usa ka adlaw niana, nakabalita kong mipauli si tiyo Boy. Dali kong miduaw kaniya sa ilang balay.

"Kumusta tiyo?" nako pa ngadto sa akong uyoan nga naglingkod sa bangko sa ilang tugkaran.

"Nia kay nagpaayo sa samad sa bala, Nyo. Maayo na lang kay napaa lang ko ug wa maintemano," tubag ni tiyo nga uban sa pinugos nga pahiyom.

"Mao ba tiyo? Wa na diay magsilbi ang imong anting-anting?".

"Kalit lang nawagtang sa akong pitaka ang libretang gamay. Gipaihaw man gud kog iro sa among labaw sud sa kampo. Nakalimot kong usa kadto sa gidili sa tiguwang nga naghatag niadto nga akong buhaton." Pahayag sa akong uyoan.

Tungod kay taas naman sab og serbisyo si tiyo, nakahukom siyang mo-retire na lang sa serbisyo. Gikalipay usab kini sa iyang pamilya kay nabalaka silang adunay dautang mahitabo kaniya kun mopadayon pa siya labi na kay wa na kaniya ang libretang itom. (Kataposan)