Sukli sa utang

Human nadungog ang akong pagtando, si Mar mibiya sa tindahan nga akong gibantayan. Pero nagbilin siyag pasalig nga mobalik siya inigkagabii sumala sa among daklit nga panagsabot.

Dihang wala na nako makita si Mar, naghinuktok ko sulod sa tindahan. Morag dili ko makatuo sa kapaspas sa mga panghitabo. Maglisod ko pagtuo nga nakahukom dayon ko pagsanong sa gustong mahitabo ni Mar -- ang iyang pagpakigkita nako inigkagabii.

Nasayod na ko kun unsay tuyo ni Mar nako. Napaghilantawan ko na kun unsay posibleng mahitabo tali kanamo sa higayon nga iyang tinud-on ang iyang gisulti nga mobalik siya inigkagabii.

Ingon man god sa naapiki ang akong pagpangatarongan sa panagsulti namo ni Mar kaganina. Mipasulabi ang kahadlok ug kabalaka sa akong hunahuna tungod kay nasayod man diay si Mar sa akong sekreto busa wala koy laing nahimo gawas sa pag-uyon-uyon na lang kaniya.

Bahala na! Gituaw kining maong mga pulong sa akong kahiladman. Mas maayo pang makasala pag-usab kay sa mabulgar ang akong sekreto ngadto sa inahan ni Ferdinand. Daan na ra bang wala makagusto si Nanay Isabel nako. Mosamot gyod ang iyang disgusto nako kun iyang masayran nga dili diay ko kasaligan nga pagka babaye.

Busa kinahanglan gyong tinagoan ang akong sekreto. Ug kun gikinahanglan man nga itahan ko kang Mar ang akong lawas bugti sa iyang pagpakahilom, ako kining buhaton basta dili lang mabulgar ang kamatuoran nga nakigdula ko'g kalayo uban kang Lorte.

Nianang pagkahapon, sayo kong nanira sa tindahan. Paghagtok sa alas sayis sa sayong kagabhion, nanihapon na ko. Nahuman na lang ko'g panghugas sa akong kinan-an, wala pay bisan anino ni Mar nga nahiabot. Wala hinuon siya magpasidaan nako kun unsang orasa siya moabot.

Hinuon, unsay ako kun dili niya tumanon ang iyang gisulti nga moanhi siya sa balay inigkagabii? Kun moanhi siya, maayo. Pero kun dili siya moanhi, mas maayo. Ang problema lang lagi kun iyang ibulgar ang akong sekreto. Malintian gyod ko niining kalakiha!

Dihang pasado alas otso na sa gabii, daw nawad-an na ko'g paglaom nga moabot pa si Mar. Mosulod na unta ko sa kuwarto sa dihang nakabati ko'g hinay nga tuktok sa pultahan.

Midali ko'g paduol sa pultahan aron kini ablihan. (Sumpayan pa)