Natukmaan nako si Keith nga naglingkod na sa ibabaw sa lamesa nga kaganina iyang gihigdaan. Gibantayan gihapon siya nila ni Bredhart ug mga kauban. Miduol ko sa iyang nahimutangan.
"Kun tinuod nga wa ka moapil og lugos nako, nganong miingon ka man kaganina nga gitulisok ka sa imong tanlag?" Gipangutana ko siya.
"Tungod kay wa koy gihimong lakang aron unta pagluwas nimo sa dihang gitabangan ka'g lugos nila ni Sheldon," tubag ni Keith. "Igo lang kong naghinan-aw nimo nga ilang gipanamastamasan. Para nako, accomplice gihapon ko sa krimen nga ilang gibuhat."
Mibati dayon ko'g katagbawan sa pagpasabot ni Keith kanako.
"Magpasalamat ka nga nakahisgot ka bahin sa tulisok sa tanlag kaganina," giingnan ko si Keith. "Mi-reflect nako ang maong mga pulong. Kun di pa tungod niadto, tingalig nahinaykan ko na ikaw."
"Daghang salamat, Sandra," ni Keith. "Salamat nga gihatagan mo pa ako'g kahigayonan nga mabuhi."
"May konsensiya sab ko. Di ko makahimo pagpatay sa tawong way sala kay kargo de konsensya ko man usab kini."
"Salamat nga mituo ka sa akong gisulti nga ang bugtong kong partisipasyon sa salaod nga gihimo nila ni Sheldon mao ra gyod ang akong pagkuyog nila."
"Daghan ka pag angay pamatud-an, Keith, aron mahingpit ang akong pagsalig nimo. Kun tinuod nga naluoy ka kanako, tabangi ko aron mahingpit na ang akong pagpanimalos kang Sheldon."
"Buhaton ko ang tanan kutob sa akong mahimo, Sandra."
Human sa akong pagpakigsulti kang Keith, migawas ko sa underground. Sa sala, nagsultihanay mi si Fernan.
"Unsay plano mo karon alang kang Keith Agcaoili?" Gipangutana dayon ko sa lider sa mga vigilante. (Sumpayan pa)