Kilometro 35

Gula 72

Daw wala sa kaugalingon nga giuli nako ngadto kang Bredhart ang iyang armas. Unya mitalikod ko ug migawas sa underground.

Misunod nako si Fernan. Si Bredhart ug pipila ka kauban nagpabilin sa underground aron bantayan si Keith.

Didto ko mopaingon sa luyo sa balay, sa gym ni Fernan.

“Unsa bay nahitabo nimo?” Gipangutana ko ni Fernan. “Are you alright?”

“Yes,” matud ko. “I’m alright.”

“Nganong wa nimo ihinayon ang pagpusil kang Keith Agcaoili?”

“Morag di ko makahimo pagpatay sa tawong way sala. Di tingali ko papahuwayon sa tulisok sa akong tanlag kun nahinaykan ko pa siya.”

“Husto ka, Sandra. Makapakonsensiya ang pagpatay og tawong way sala.”

“Natandog ko sa iyang gisulti dihang naghisgot siya’g tulisok sa tanlag sa dihang pusilon ko na unta siya. Gusto kong masayod sa hinungdan nganong nakasulti siya’g ingon niadto.”

“Mituo ka na ba nga wa gyud siya’y nahimong kasal-anan nimo?”

“Di pa hingpit ang akong pagtuo. Pero inanay na kong nakombinser.”

“Di sa pag-unsa, ha. Pero nituo baya ko nga nagsulti si Keith sa tinuod. Nga wa gyud siya makaapil sa paglugos nimo ug giluwas ka niya sa kamatayon pinaagi sa pagbutang kanimo sa gakit nga gipaanod sa suba.Misibo kini sa giasoy ni Bredhart kun sa unsang sirkumstansiya nga ila kang nabangalan didto sa suba.”

Wala ko motingog.

“Mora’g tinuod ang gisulti ni Keith nga naluoy siya nimo,” ni Fernan pa. “Wala lang siya sa saktong posisyon pagtabang nimo niadtong higayona nga gitabangan ka’g lugos nila ni Sheldon.”

Wala gihapon ko motingog. Unya gitalikdan ko si Fernan. Mibalik ko’g sulod sa underground. -- Sumpayan pa