Gula 69
Dihang mibalik pagbuka ang mga mata ni Keith, gipadayon nako ang pagpakigsulti kaniya. Daghan ko’g gustong masayran gikan kaniya.
“Nganong gibun-og ka man nila ni Sheldon, Keith?” Gipangutana ko siya. “Nganong nasuko man sila pag-ayo kanimo?”
“Tu-tungod kanimo, Sandra,” maluyahon ang tingog niya nga mitubag.
“U-unsa?”
“Nasuko sila pag-ayo nako sa dihang ilang nasayran nga buhi ka.”
“A-ang buot mong ipasabot nga nasayod na sila si Sheldon nga dako kong buhi?”
“Mao kana, Sandra. Ug kini ang hinungdan nga nasuko sila nako tungod kay nipalpak kuno ko sa ilang gipabuhat nako.”
“Wa ko makasabot sa imong gipanulti. Naglibog ko.”
Si Keith misugilon kanako nga siya ang gisugo nila ni Sheldon ug mga kauban sa pagtambog nako ngadto sa suba niadtong gabii human sa ilang pagbanosbanos og lugos nako. Gusto ni Sheldon nga mamatay ko pinaagi sa pagbuntog nako sa tubig sa suba aron malumos ko ug mamatay.
Mihunong pagsugilon si Keith dihang iyang namatikdan nga may miduol sa among nahimutangan. Sila si Fernan ug Bredhart.
“Ipadayon ang pagsaysay, Keith,” giingnan ko siya.
Si Keith mitug-an nga imbes iya kong buntogan nga walay panimuot sa suba, nagdali-dali hinuon siya’g himo og gakit nga maoy kabutangan sa akong lawas aron ianod ko nga dili malumos. Naluoy kuno siya nako maong wala niya tumana ang sugo nila ni Sheldon nga buntogan ko sa suba.
“Naluoy ka nako pero mitabang ka sab sa pagpahimulos sa akong pagka babaye,” giingnan ko si Keith.
“Nasayop ka, Sandra,” ni Keith pa. “Wa ko moapil paglugos nimo. Ila kong giapura pero nagdumili ko!” -- Sumpayan pa