Sukli sa utang

Gula 228

Miabot ang adlaw nga gitakda sa akong paglarga pauli sa Bohol. Si Ferdinand maoy nangunay paglukat sa akong ticket sa barko. Siya sab ang nanghipos sa akong mga dad-onon paingon sa probinsiya.

Alas nuybe sa gabii ang schedule sa paglarga sa barko gikan sa pier sa Manila. Wala pa gani alas otso, didto na mi sa pier. Gihatod ko ni Ferdinand sakay sa sakyanan ni Mr. Dee nga iyang gihulaman kay daghan man ko’g mga bagahe.

Dihang napahimutang na ang tanan kong mga bagahe sa taas sa barko, si Ferdinand mibalik na ngadto sa Binondo. Gibati ko ang kamingaw niya samtang nagpaabot nga molarga na ang barko nga akong gisakyan paingon sa Bohol. Dugaydugay na sab ming dili magkakita si Ferdinand.

Ang barko nga akong gisakyan nagtanyag og serbisyo sa long distance. Gituyo kini nila aron kadtong mga pasahero nga gustong mokontak sa ilang mga kabanay didto sa probinsiya makahimo sa pagpanawag aron sila masugat. Nakahunahuna ko nga manawag kang Lorte.

Kay wala man ko maka-memorize sa telephone number sa boarding house ni Lorte sa Tagbilaran, gikuha nako gikan sa akong wallet ang papel nga gisuwatan sa maong mga numero. Ako kining gitawagan sa long distance. Ang tag-iya sa balay maoy nakatubag.   Gisayran ko kini sa akong tuyo ug wala madugay nagkasulti na kami si Lorte.

“Kumosta ka na,” mubo kong tubag. “Mopauli na ko diha.”

“Mao ba? Kanus-a man?”

“Actually, dia na ko sa barko. Alas nuybe sa gabii ang among ilarga. Sugata ko, ha. Kaadlawon kuno sa sunod adlaw ang among pag-abot diha.”

“Sige, mosugat ko.”

Human sa panagsulti namo ni Lorte sa long distance call, mibalik na ko sa nahimutangan sa akong tiheras. Wala madugay, mibiya na ang barko nga akong gisakyan sa Manila ug malinawon kining milawig tadlas sa lapad nga lawod paingon sa Bohol.

Kaadlawon sa sunod adlaw midunggo gyud ang barko sa pantalan sa Tagbilaran. Misugat gyud si Lorte nako. Gitabangan ko niya’g dala sa akong mga bagahe. Wala una ko magpahatod niya ngadto sa terminal sa bus nga mobiyahe paingon sa lungsod sa Mabini.Mi-check in una mi sa usa ka hotel! -- Sumpayan pa