Sukli sa utang

Gula 227

Taudtaod gayod ang pagbag-iray sa among mga panan-aw. Unya nag-abot ang among mga ngabil. Hangtod nga nagtinal-opay gayod ang among mga dila sa pinadulot nga hinagkanay.

Paglabay sa mga gutlo, nagkainit ang among pagpinarayganay. Hangtod nga gitambayayongan namo ni Ferdinand pagkatkat ang parnaso sa ikapitong langit. Milampos gyod mi pagkab-ot sa himaya nga among gibugtaw.

Miabot ang adlaw sa Pasko. Gidapit mi ni Mr. Dee sa Christmas party sa ilang pamilya. Dili unta ko motambong kay maulaw ko. Siyempre, seguradong kami ray molahi didto kay mga datouman ang pamilyang Dee.

Pero namugos gyod si Ferdinand nga ikuyog ko. Nagtugon man gyod kuno si Mr. Dee nga kinahanglang kauban ko niyang motambong sa Christmas party. Nikuyog na lang gyod ko ni Ferdinand.

Ang pinuy-anan ni Mr. Dee nahimutang sa Loyola Heights Subdivision sa Quezon City. Pulos adunahan ug milyonaryo ang nanimuyo sa maong dapit. Alegre na ang ilang panimalay sa among pag-abot. Ang sulod ug gawas sa balay nalukop sa mga Paskohanong dayan-dayan.

Giabi-abi mi’g maayo sa pamilyang Dee. Wala ko ma-out-of-place kay ang asawa ni Mr. Dee maayo man sab kaayong nakatagad nako.

Milabay ang Pasko. Miabot ang Bag-ong Tuig. Alegre kaayo ang among pagsugat sa tuig sa unggoy. Nahimuot ko ni Ferdinand kay nagpalahi mi’g selebrasyon. Dungan sa paglanog sa daghang mga buto-buto sa gawas gumikan sa firecrackers ug ingon man sa fireworks display, kami ni Ferdinand nanirado sa among kuwarto sa bilding.

“Maayo dinhi kay luwas tas mga pabuto,” niya pa, “Maglikay tas mga aksidente nga firecrackers-related.”

Pero may lain pa diay siyang plano. Kay samtang nagpadayon ang mga buto-buto sa gawas, nagsaulog sab mi sa sulundong ritwal sa gugma sulod sa lawak nga among nahimutangan. Tugob sa kainit ang among panagsawo sa dugos sa lawasnong kalipay nga among gitagay.

“Human sa Three Kings puyde ka nang mopauli sa Bohol,” giingnan ko ni Ferdinand.

“Ikaw ang mag-igo,” maoy akong tubag.

Samtang naghunahuna sa umaabot kong pagpauli sa Bohol, wala lang tuyoa nga nahinumdoman nako si Lorte. Gimingaw na ko kang Lorte. Ug excited na ko nga magkakita kami! (Sumpayan pa)