Ang barko nga nikaub

Lilia ra sa pruwa (dulong sa barko) kun nganong mora ma’g wa ta kadagan og kusog. Mora mag may nibabag sa atong giagian!" mando ni Kapitan Cuizon ni Mario, sereno sa m/v Dona Josefa nga naglawig karong buntaga gikan sa Manila ngadto sa Sugbu.

Nia na sila duol sa isla sa Romblon. Nanaug dayon si Mario sa puwente (bridge sa barko o front seat kun truck ang hisgutan) ug ningadto sa pruwa. Nitungtong gyud siya sa tumoy sa barko (pareha sa gitungtungan ni Leonardo de Caprio ug iyang ka love-team sa "Titanic") ug nilili ngadto sa ubos. May nakita siya ug nidagan dayon siya balik sa puwente.

"Dunay balyenang nadasmagan sa sentro sa dulong sa barko, sir. Ang lawas sa balyena nagbabag nga gihandos sa barko. Mora kadak-ag Ceres Bus ang maong balyena. Mao ni nakabug-at sa dagan sa barko," sumbong ni Mario.

"Kuyogi ko kay ako gyung tan-awon mismo! sa kapitan.

"Steady lang Colas," mando niya sa timonel.

"Yes, sir!" tubag ni Colas. Nanaug ang kapitan ug ang sereno sa puwente.

Usa sa pinakakusog nga barko ang m/v Dona Josefa nga magbiyahen og Cebu-Manila, vise versa. Gipanag-iya ni sa Othico Shipping Lines nga base sa Sugbu ang main office. Singko mil ka pasahero ang kapasidad ini. Bayente mil toneladas ang kapasidad sa kargamento. Lunes sa buntag mogikan ni padulong Manila. Miyerkules sa buntag mogikan sa Manila balik Cebu. Biyernes sa buntag balik na man sa Manila. Sabado's gabii balik na man sa Cebu.

Si Kapitan Quintin Cuizon sobra diyes anyos na ang serbisyo sa Othico Shipping Lines. Nagsugod siya sa pagkaagregawo. Duha ka tuig siyang apprentice. Pagkahuman nieksamin siya pagka-Third Mate. Pasado. Ug na-promote dayon siya. Dangtag usa ka tuig ni-eksamin siya pagka-Second Mate. Pasado. Ug paglabay sa laing usa ka tuig, ni-eksamin siya sa pagka-Chief Mate. Pasado gihapon. Lima siya ka tuig nga Chief Mate una siya ni-eksamen sa pagka-Kapitan. Pasado gihapon siya. Lainlain hinoon nga barko sa kompanya iyang maasayinan sa kada ma-promote siya. Usa ka tuig pa siyang kapitan ining Dona Josefa.

"Standby Engine!" mando sa kapitan dihang nabalik na siya sa puwente.

"Standby Engine, sir!" tubag sa agregawo nga maoy naggunit sa Engine Telegraph nga maoy magmando sa Engine Room kun unsay buhaton sa makina sa barko. Ug gilaso niya ang telegrapo aron motudlo sa markang "Standy". "Stop Engine!" sa kapitan.

"Stop Engine, sir!" tubag sa agregawo. Ug giliso niya ang telegrapo nga motudlo sa "Stop". Nihunong ang dahunog sa makina. Nag-aginod ang barko.

"Slow astern,” sa kapitan.

"Slow astern," sa agregawo. Ningulob ang makina paatras.

"Stop" sa kapitan.

"Stop" sa agregawo.

Nimando ang kapitan nga ang mayordomo magpauban og duha ka ordinary sailors aron magpakanaug og baroto. Goyuron ang balyena sa kilid sa barko. Kay ipabera niya sa boom. Ikarga niya ang balyena aron i-report sa DENR.

Dihang nanaug ang mga tripulante nga iyang gisugo ug andam na ang balyena nga mabira sa boom, may niabot nga lantsa. Nagpaduol sa tuong habig (starboard side) sa barko.

"Kapitan! Ayaw ninyo ikarga ang balyena. Mamatay na diha. Ibalik ninyo sa dagat aron mabuhi pa!" matud sa tawo nga bungoton. Taas ug puti iyang bungot. Amgid-amgid siyag hitsura ni Triton nga uyoan ni Little Mermaid. Kulang na lang niya ang bangkaw nga tuloy talinis. Nihulbaw siya kilid sa kobertada sa lantsa sa walang habig (port side).

"Amo ning i-report sa DENR. Kay basig pabayron hinuon mi ini. Nadasmagan man ni sa barko!" tubag sa kapitan.

"Akseptado ko nga endangered species ning balyena. Mao bitaw'ng di ko gustong mamatay ni. Kun inyong ikarga, seguradong mamatay ni. Kun inyong ibalik sa dagat, matambalan pa ni nako!" sa tawong bungoton.

"Di ko kasalig nga matambalan pa ni nimo! Himatyon na man ni. Dakog samad. Daw nabali ang dugokan!" sa kapitan.

"Nahala! Ikaw god!" sa tiguwang. "Ayaw la’g sumala sa sunod biyahe ninyo!" dugang niya sa iyang kaugalingon.

Sa sunod pagbalik og agi duol sa Romblon, sa Sibuyan Island, kalit may dako kaayong bawod nga nisugat sa barko. Nikaub ang m/v Dona Josefa. Wa gyu’y survivor. (Kataposan)