Sukli sa utang

Gula 223

Nagpadayon ang pagdula namo ni Lorte sa nagbagang kalayo sa pagpakasala. Ang akong pagluib sa akong bana nga si Ferdinand ingon sa wala nay kinutoban. Importante gyud alang nako nga may makatambal sa bation kong kahidlaw sa lawasnong panginahanglan matag karon ug unya. Ug kay tua man ang akong bana sa Manila, kinahanglang modula ko’g laing team diri sa probinsiya aron dili ko magsalimuang sa kahidlaw.

Gumikan sa dobleng pag-amping namo ni Lorte, nagtuo ko nga wala gayo’y usang nagduda sa mga paryente ni Ferdinand nga duna mi sekreto. Pang FAMAS sab ang acting ni Lorte maong dili gyud masabtan sa mga tawo nga may tinagoan ming relasyon.

Usa ka higayon niana, nakahunahuna ko nga sulatan ang akong mga ginikanan didto sa Bicol. Sukad sa akong pagbiya sa among dapit didto sa Iriga City, karon pa gyud ko nakahunahuna’g sulat sa akong mga ginikanan. Wala man hinuon ko mahikalimot sa akong mga ginikanan pero mora’g wala ko’y panahon sa pagpahibalo kanila sa akong kahimtang.

Sa akong sulat alang nila ni Papa Augusto ug Mama Clemencia, gipahibalo ko sila nga sa Bohol na ako nagpuyo. Gisuginlan ko sila pinaagi sa sulat nga naminyo na ko’g usa ka Bol-anon ug dili sila mabalaka kay maayo ang akong kahimtang sa Bohol. Gipadala dayon nako ngadto nila ang akong sulat pinaagi sa koreyo.

Paglabay sa usa ka semana, nakadawat ko’g sulat-tubag gikan sa akong mga ginikanan didto sa Bicol. Nalipay kuno sila nga nakahunahuna ko’g padala og sulat ngadto kanila. Gimingaw na kuno sila nako. Dugay na kunong panahon nga nagpangita sila nako kay wala na man gyud kuno sila makabalita bahin nako sukad sa akong pagbiya sa Bicol.

Gidetalye sab sa ilang sulat kanako nga gusto unta silang mobakasyon sa Bohol aron magkakita kami. Ugaling lang kay dili na makasugakod og biyahe si Mama Clemencia tungod sa sakit nga arthritis. Niini, nakaingon ko sa hilom nga maayo ra sab nga dili sila makahimo pagbiyahe paingon sa Bohol. Dili ko gustong moadto sila sa Bohol kay tingali pa man unya hinuon og mabuking ang tanan kong tinagoan sa akong kinabuhi. Daghan pa ra ba’g wala masayri si Ferdinand ug ang iyang mga paryente mahitungod kanako.

Miabot ang bulan sa Disyembre. Mibakasyon ko sa Manila segon sa sabot namo ni Ferdinand aron adto ko mamasko ug bag-ong tuig. Nalipay ko nga nagkakita mi si Ferdinand. -- Sumpayan pa