Gula 61
Misalir ang akong paagi. Tungod ba kaha sa iyang curiosity, si Lyle misunod nako. Nagdagan sab siya nga miagpas kanako.
“Miss, kadiyot lang,” nabati ko ang iyang tingog samtang nagpadayon ko pagdagan paingon sa hilit nga bahin sa beach resort.
Maayo kay dili kaayo daghan ang mga tawo nga nangaligo sa beach resort. Daghang mga cottage nga nabakante.
Pag-abot nako sa luyong bahin sa kataposang cottage nga nahasimpig na sa koral nga hollow blocks sa beach resort, mihunong ko pagdagan. Miatubang ko ni Lyle. Mihunong na sab siya pagdagan.
“May problema ka ba, Miss?” Gipangutana ko ni Lyle.
Wala gyud siya makaila nako tungod sa gisul-ob kong takoban.
“Ikaw ang akong problema, Mister,” giingnan ko siya.
“Ha-ha?” Daw nakugang si Lyle sa akong gisulti.
Ug misamot ang iyang kahikugang dihang gilanit ko ang armas nga may silencer gikan sa holster niini nga gipahimutang sa akong bilahan. Gidiretso ko’g tion kaniya ang gigunitan kong armas.
“U-unsay buot ipasabot niini?” Nangluspad si Lyle.
“Samtang buhi ka pa dili ko mahimutang,” nako pa. “Busa kinahanglang mohunong na karon ang imong edad.”
“U-unsay akong sala?”
“Nahinumdom ka sa krimen nga inyong gibuhat didto sa Kilometro 35?”
“W-wa koy nahinumdoman...”
Gitangtang ko ang akong takoban aron makaila na si Lyle kanako.
“S-sandra...” misiga ang iyang mga mata dihang iya na kong nailhan. “I-ikaw... Bu-buhi ka diay?”
“Nagpakabuhi ko aron maningil sa inyong kasal-anan!”
Ug...Tsug! Tsug! Tsug! Tsug! -- Sumpayan pa