Kadtong binuhat nga nakapabuang kanako

Maoy akong namat-an sulod sa may San Fernando Emergency Hospital, sa usa ka ward nga akong gihigdaan, nga gialirongan ako sa daghang bisita, lakip na si Mama Repsalyang, nga taud-taod na nga nabiyuda kang anhing Papa Romy.

“Ayaw atha sa paglihok ang imong kalawasan...anak, kay basin mabughat ka?” dihay kaluming sa tingog ni Mama Repsalyang nga mihana og kupot sa akong bukton nga diha pay dextrose.

“Pastilan Romel...kalimti na lang kadto sa dayon si Lisapera, nga maoy naingnan sa imong sakit!”

Ambot unsang pagkaunsaa.. nga sa dihang gihisgotan ni Mama Repsalyang, ang ngalan ni Lisapera... mikalit man ako sa pagbakho!

Wa lang tuyoa, nanumbaye sa may ngilit sa akong panumdoman, ang maanindot namong kaagi ni Lisapera, samtang kami nagkahimamat sulod sa may beer garden, dapit sa may pier 4.

Dili man gud ikalimod, nga matag semana moadto ako sa siyudad, aron akong i-submit ang Monthly Report, tali sa Monthly Income, sa dakong planta sa simento nga sa pagkakaron akong gialagaran, isip Plant Accountant.

Sa una pa lang gani nga higayon nga nasulod ako sa pinakasikat nga Moonlight Serenade Beer Garden, gikahimamat ko si Lisapera. Sa kadali sa among panagkaila, misangpot sa among panaghigugmaay.

Sa kabatan-on pa gud sa akong panuigon, ingon sa malanay ako nga magsud-ong kang Lisapera, diin alang kanako sa iyang nahuptan nga katahom, dili siya bagay nga mahimo lang nga usa ka GRO!

Adlaw kadto nga Sabado, diin mituyo lang gayod ako sa pag-adto sa maong beer garden. Ingon sa mihulma sa pamayhon ni Lisapera ang kamagul-anon.

“Sakit kaayo nga sulod sa pipila ka buwan natong panaghigugmaay...Romel, imong mahibaw-an ang matuod kong pagkatawo,” dihay pipila ka lusok sa luha nga inanay midaligdig subay sa manggahon nga aping ni Lisapera.

Ingon ako sa nahimut-okan. Lugos ako makaginhawa.

Ug mao na lamang ang akong nabalitaan gikan sa kauban ni Lisapera nga mga GRO, nga usa diay siya ka bayot!

Sukad niadto dili na ako ganahan mokaon. Miundang ako sa akong trabaho ug kanunay na lang magpanangpit sa ngalan ni Lisapera...hangtud nga ako dili na makaila og tawo kay nabuang. (Kataposan)