Dili hukman ang panagway

May pagkakuwang og kabuot kun matawag tag amaw-amaw si Senyong sa ilang dapit sa sityo Bonbonan sa barangay Labangon. Apan bisan pa sa iyang naangkon nga depekto, dako siya’g matabang sa mga silingan nga mamalihog kaniya labi na gyud ang higala niyang si Greta nga tindera’g tuba sa ilang dapit diin sagad niyang estambayan.

Wa nay inahan si Senyong ug ang iyang amahan nga si Mundo maoy nagbuhi kaniya nga nagsalig lang usab sa iyang pension sa SSS matag bulan.

“Tagayi ra ko’g usa ka basong tuba, Gret. Ipuno lang unya na sa lista kay bayran lang nya tika sa Lunes puhon. Makakobra naman ko anang adlawa sa akong pension,” ni Mundo pa nga nagtubod ang laway nga nagtan-aw sa tuba sa garapon nga bag-ong hatud.

“Way problema Noy Mundo basta motultol lang og bayad. Hain man diay si Senyong, Noy?” tubag sa dalaga.

“Duna lang unta ko’y ipamalihog niyang ipaalsa didto sa luyo sa among balay,” puno ni Greta kinsa mao usay tuyo ni Mundo nga biyudo na sa iyang pag-inom-inom og tuba sa tindahan niini.

“Nagsuroy-suroy na sad tingali to sa unahan. Bisag asa na lang nang tawhana moabot. Maayo gani kay di sad hilabtan sa mga estambay sa silingang barangay sa Calamba,” matud pa ni Mundo dayong yarok sa usa ka basong tuba.

“Oy, si Senyong man tingali nang nagpadung nganhi, Noy? Nagngisi ra ba ug may gibitbit,” nagkanayon si Greta nga unang nakakita sa anak ni Mundo.

“Unsa nang da nimo, Nyong? Mora man og kwentas nga naputos sa lapok?” sukot sa amahan.

“Kwe...kwentas bitaw ni Tay. Di..didto ni nako kit-i sa huwatanan og sakyanan sa may eskina,” tubag ni Senyong nga giisa ang tuong kamot naggunit sa kwentas.

“Ambi kuno kay akong tan-awon kun tinuod ba. Basig fancy ug gold plated lang,” matud sa amahan.

Gitunol ni Senyong ang kwentas sa amahan ug gisuling-suling kini’g tan-aw nga nangingking naggunit kay nabulit man sa lapok nga miuga na.

“Di ni tinuod nga gold, Nyo. Fancy ra ni ug hugaw pa gyud. Ilabay na oy! Gahugaw-hugaw lang ka?” ni Mundo pa nga medyo nasuko nga mitunol og balik sa kwentas ngadto kang Senyong.

“Ihatag lang na nako, Nyong. Ako nang limpyohan. Maayo na lang nang ikwentas kay wa gyud tawon koy alahas bisan fancy na lang,” sagbat ni Greta nga dang pahiyom ngadto kang Senyong nga mihatag lang usab dayon sa kwentas ngadto sa dalaga.

Sa dihang namauli na ang amahan ug anak, gilimpyohan sa dalaga ang kwentas ug nalipay kining nakakita nga migilak-gilak kini.

“Baga raba og kadena ang gibitayan niining pendant nga porma og krus. Mora man gyud di fancy, ako kaha ning isuway patan-aw sa ahensiya. Basin tinuod ning gold?” nakatuaw si Greta sa iyang kaugalingon.

Daling mipaingon sa ahensiya ang dalaga ug dako niyang kalipay sa dihang gisultihan siyang tinuod nga bulawan ang kwentas ug kinse mil ka pesos ang dawat niini kun iprenda. Way panaganang giprenda ni Greta ang kwentas ug mipalit siya’g bag-ong kwentas bili og singko mil ka pesos. Gipalitan niya’g mga t-shirts si Senyong ug mga pagkaon sa grocery.

Pagkaugma, gihatag niya kang Senyong ang iyang gipamalit ug gihatagan og bahin ang amahan sa bayad sa giprendang alahas nga kinit-an.

Nakapanlingo-lingo si Mundo ug nakatuaw sa iyang hunahuna nga di gyud diay maayong husgahan ang panagway sa bisan unsang butang ingon man sa usa ka tawo sama kang Senyong. Makatabang ra diay sila nga di lang hibaw-an. (Kataposan)