Kilometro 35

Gula 50

Wala makamatikod si Bredhart nako kay nagtalikod man siya gikan sa akong gibarogan. Gawas pa, ang kalawom sa iyang paghinuktok ingon sa nakaganoy kaniya ngadto sa kalibotan sa pag-usara.

Miigham ko’g hinay aron pagkabig sa pagtagad ni Bredhart. Tuod man, milingi siya. Ug morag nakugang siya’g diyotay pagkakita kanako.

“Ikaw man diay,” mao ray iyang nasulti.

“Nganong wa ka pa man matulog?” Gipangutana ko siya.

“Mihanggap una ko’g lab-as nga hangin dinhi. Wa pa man ko dukaa.”

“Mora’g lawom lagi ang imong gihunahuna?”

“A...nahinumdom lang ko sa akong igsuon.”

“Imong manghod o maguwang?”

“Akong manghod. Siya’y hinungdan kun nganong gisagop ko ang kinabuhi sa usa ka vigilante.”

“U-unsay buot mong ipasabot?”

Si Bredhart misugilon kanako nga usa ka nursing student ang iyang manghod. Siya’y migasto sa pagtungha niini sa kolehiyo. Graduating na unta ang iyang manghod sa kursong gikuha, gitulis ug gipatay kini sa duha ka sakop sa Spirc gang nga naglihok sa dakbayan sa Obic.

Ang manghod ni Bredhart gitulis sa barangay Lahugay sa paggawas niini sa balay sa iyang klasmet. Ang manghod ni Bredhart nanghuwam og adaptor sa laptop nga ilang gamiton sa ilang project ug sa iyang pagpauli gikan sa balay sa iyang klasmet, giatangan siya sa duha ka tulisan.

Gikuha sa mga tulisan ang mahalon niyang cellphone ug dihang midagan kini, gipusil kini sa usa sa duha ka tulisan. Patay dihadiha ang manghod ni Bredhart nga giluthang sa duha ka sakop sa Spirc gang.

“Gipangunayan ko ang pagsilot sa mga tawo nga miutang sa kinabuhi sa akong manghod maong nag-vigilante ko,” ni Bredhart pa. -- Sumpayan pa