Ang payag sa magtiayong Fredo-Lusing nahimutang dili halayo sa lasang. Sila rang duha ang nagpuyo kay ang ilang mga anak nangaminyo na man tanan ug atua na manimuyo sa dakbayan.
Usa ka gabii niana.
“Awoooo.. ..awwoooo...
awwooooo...”
Ang kamingaw sa kagabhion gibuak sa makapanlimbawot sa balhibo nga uwang sa iro nga naggikan sa lasang.
“Fred, tinuod gyud tingali ang ilang giingon nga dunay mga maligno ning dapita,” nagkurog sa kalisang si Lusing.
“A, tuo ka man niana, Sing,” pintok nga namulong si Fredo. “Laag lang tingali kanang iroa nga nahisum-ok sa lasang ug wala na makagawas!”
“Mobiya ko dinhi ugma ug adto na ko estar sa ilang Mama Mayling sa patag,” misamot ang kahadlok ni Lusing.
“Lusing?” mao ray nalitok ni Fredo. Unya iyang gikuha ang iyang pinuti ug gidagkotan ang sulo ug maisugong nanaog. Maoy iyang girumbo ang lasang. “Kun makit-an tikang iroa ka, impas ka gyud!”
“Awwoooo...awwoooo...
awwwoooo....” nagpadayon pag-uwang ang iro.
“Kun iro ka mang tinuod ug kun unsa may imong nakita, dili kamo pasayluon ning akong pinuti!” nagpaminti si Fredo.
“Awwwooo... .awwwooo.. awwwoooo...”
“Diin ba gyud maggikan ha?”
Unya kalit siyang naigking sa dihang maoy iyang natukmaan ang iro nga...
“U-uy! Diyos ko! Di-dili!”
Mikabad pagdagan si Fredo balik sa iyang agi. Pag-abot niya sa payag iyang gisuginlan si Lusing bahin sa iyang nakita.
“U-unsa diay, Fred?” naulian sa kakuyaw si Lusing.
Pagkaugma sa buntag mibalik si Fredo sa lasang kuyog si Lusing Ug...
“Mao kana ang iro nga nagsige’g uwang kagabii, Sing. Gikaguol diay kaayo niya ang nahitabo sa iyang agalon. Mangangayam diay kanang tawhana ug gitundok tingali sa mala’ng bitin samtang naglatagaw sa sulod sa lasang ug namatay,” pasabot ni Fredo sa iyang asawa.
“Santisima Trinidad!” nakatuaw si Lusing pagkakita niya sa usa ka lalaki nga nagligdas nga wala nay kinabuhi ug nanglagom ang liog nga agi sa tinundokan sa mananap. Diha ang iro sa kiliran sa lalake. Nagngulob ang hayop ug may riple sa duol. Adunay say jungle bag.
“Kining, Sing...” milingi si Fred sa asawa.
“Ngano, Fred?”
“Lahos paglugsong sa patag pero pauli lang dayon inigkahuman nimong pahibawo sa mga awtoridad bahin niining hitaboa.”
Ug mitalikod si Lusing. (Kataposan)