Gula 47
Usa ka hapon niana, maoy nag-unang balita sa telebisyon ang bahin sa usa ka batan-ong lalaki nga gidunggab sa upat ka wala mailhing lalaki nga misulay pagtulis kaniya samtang nag-text siya sa daplin sa dalan Balilihan sa downtown sa siyudad sa Obic.
Misukol ang maong batan-on sa upat ka tulisan nga buot mokuha sa mahalon niyang cellphone. Nakigsinumbagay siya sa mga suspek. Apan ang usa sa mga suspak milipot sa iyang luyo ug gidunggab siya niini ginamit ang icepick. Misibat dayon ang mga suspek human sa insidente.
Pero gidemalas ang mga suspek kay nasundan sila sa miresponde nga kapolisan. Nasikop sila atol sa gihimong hot pursuit operation sa mga polis ug nagtingkagol sila sa detention cell samtang nagpaabot nga pasakaan og tukmang kaso.
“Nakaseguro kong mobutang og piyansa ang mga suspek sa higayon nga mopasaka nag kaso batok nila ang ilang biktima,” nagkanayon si Fernan ngadto nila ni Bredhart. “Bantayi ninyo sila. Sa higayon nga makagawas na sila sa bilanggoan, taposa na ninyo ang ilang kadaotan.”
“Areglado, Boss,” si Bredhart ang mitubag.
Tuod man, dihang nakagawas na sa bilanggoan ang upat ka badlongon sa katilingban, gitumba sila sa mga vigilante nga gipangulohan ni Bredhart Javinal, ang pangabaga sa lider nga si Fernan Rivas.
Pagkaugma, laing street crime na usab ang nahitabo. Gibalita sa usa ka tabloid ang nahitabo sa usa ka babaye nga nakuyapan human pusposi sa usa ka isnatser. Sumala sa taho, nabulit gyud sa samad ang bagulbagol sa biktima ug nakuyapan pagkaigo sa pagpuspos sa isnatser gamit ang armas de fuego niini gumikan kay nagdumili ang biktima paghatag sa iyang bag ngadto sa suspek. Nadala gyud sa isnatser ang bag sa biktima nga may sulod nga P14,000 cash, cellphone ug mga alahas! -- Sumpayan pa