Si Job, ang Dios ug Satanas

Usa ka tawong matarung si Job ug masinulondon sa mga kasuguan sa Ginoo. Duna siya’y 10 ka mga anak, 7 ang lalaki ug 3 ang babaye. Duna siya’y 7,000 ka mga karnero, 30,000 ka mga kamelyo, 500 ka bakang laki ug 500 ka bakang baye ug daghan kaayo siyang sulugoon.

Usa ka higayon nagsultihanay ang Ginoo ug ang Satanas.

"Diin ka gikan Satanas?"

"Gikan sa akong pag-adto nganhi niining kalibutan aron pagpangita og biktimahon."

"Imo bang gipalandong si Job nga akong alagad? Kay walay sama kaniya nga matarung ug mahadlokon kanako ug nagpalayo sa dautan."

"Mahadlokon ba si Job kanimo sa walay hinungdan? Bakyawa ang imong kamot batok kaniya kondili ka ba niya tonglohon."

"O -- sige," matud sa Ginoo, "ihatag ko siya sa imong mga kamot, ayaw lang tanduga ang iyang lawas."

Busa milakaw si Satanas ug gipatay ang tanang hayop ni Job lakip ang tanang sulugoon nga nagbantay niini. Pila lang ka gutlo ang milabay, ang tanang mga anak ni Job, lalaki ug babaye nga nangaon didto sa balay sa usa nila ka igsoon, nangamatay kay nahugno ang balay ug usa lang ka sulugoon ang nahibilin aron pagpahibalo kang Job.

Pagkadungog ni Job sa gibalita sa sulugoon, gigisi niya ang iyang sapot ug gikiskisan ang iyang ulo ug mihapa sa pagsimba sa Ginoo nga naga-ingon. ''Hubo akong migula sa tagoangkan sa akong inahan, hubo usab akong mopauli. Ang Ginoo ang naghatag, ang Ginoo ang nagbawi, bulahan ang ngalan sa Ginoo." Niining tanan wala makasala si Job ug wala usab niya pakasad-a ang Ginoo.

"Unsa na Satanas -- nakita mo na kun unsa ka matarung si Job."

"Panit sa panit," tubag ni Satanas. "Bakyawa ang imong kamot kang Job ug tanduga ang iyang lawas kondili ka ba niya tunglohon."

"Sige -- buhata ang imong gusto sa iyang lawas apan ayaw lang hilabti ang iyang kinabuhi," matud sa Ginoo.

Busa milakaw si Satanas ug gihatagan si Job og sakit sa tibuok lawas nga gikan sa lapalapa hangtud sa iyang alimpulo sa ulo naputos sa hubag si Job. Hangtud ang iyang asawa misulti kaniya. "Magpabilin ka ba gihapon nga mosimba sa imong Dios? Tungloha ang Dios ug magpakamatay ka."

"Nagasulti ka sama sa usa ka babayeng buang-buang," matud ni Job sa iyang asaw, "modawat lang ba kita sa maayo gikan sa Dios ug sa dautan dili na?" tubag ni Job.

Human niining hitaboa, gibalik sa Dios nga doble ang tanan nga nawala kang Job, mga hayop ug mga kabtangan. Nanganak pa ang asawa ni Job og 7 ka mga lalaki ug 3 ka babaye. Ug sa tibuok nga kayutaan niadtong panahona, walay makatupong sa kaanyag sa mga anak ni Job.

Ug nabuhi pa si Job sa daghang mga katuigan. (Kataposan)