Sukli sa utang

Gibati namo ang hingpit nga katagbawan sa pagtagay sa lawasnong kalipay.

"Magkita ta ugma," giingnan ko ni Troy human sa makutas namong kombate sa kama.

"Manawag lang ko nimo ugma sa buntag," nako pa. "Iniglakaw ni Ferdinand paingon sa trabaho, manawag dayon ko nimo."

"Sige," niya pa. "Paaboton ko ang imong tawag."

Unya nanggawas na kami sa motel.

Pagkaugma, gituman ko ang akong gisaad ni Troy. Nanawag ko niya pinaagi sa telepono.

"Available ko karon," giingnan ko siya. "Asa ta puydeng magkita?"

"Ngari lang sa balay nga akong gipuy-an sa Pasay," tubag ni Troy.

Tuod man, miadto ko sa gipuy-an ni Troy sa Facundo St., Liberated, Pasay City. Suheto ko sa maong lugar kay kanunay na man kong mag-adtoan didto sukad nga nagkarelasyon kami si Troy.

Pag-abot nako sa iyang gipuy-an, mao gyo'y pagkahuman og kaligo ni Troy. Presko pa siya kaayo. Nangalisbo sa sulod sa balay ang kahumot sa sabon nga iyang gigamit.

Wala mi mag-usik og panahon. Amo dayong gisangka ang among mga kaka. Tugob sa kainit ang among panagsawo sa dugos sa himaya nga among gitagay. Gitilok namo ang mga gutlo sa kalipay.

Sukad niadto, hapit tanang adlaw na kaming magkita si Troy. May mga higayon gyod gani nga magsagunson ang mga adlaw sa hilon namong panag-abot sulod sa usa ka pribadong dapit. Usahay moadto ko sa iyang gipuy-an sa Pasay.

Hangtod nga usa ka hapon niana, sa pagpauli ni Ferdinand gikan sa trabaho, gipahibalo ko niya nga nakalukat na siya'g tiket sa barko alang sa among pagbiyahe ngadto sa Bohol.

"Naka-file na ko'g vacation leave nga mo-take effect sunod semana," ni Ferdinand pa. "Molarga na ta sa Lunes." (Sumpayan pa)