Gula 44
Pagkaugma, gipadayon nako ang nasugdan nang bulohaton sa pagpanimalos kang Sheldon ug sa iyang mga barkada nga milugos kanako. Pinaagi sa pag-abag ni Fernan ug sa iyang mga sakop nga vigilantes, sayon ra namong na-trace ang prospect. Si Verle Juizo!
Kauban ni Sheldon ug ubang mga barkada, gisundan namo si Verle nga misulod sa usa ka videoke bar. Gipanid-an lang namo sila nga naghudyaka. Unya dihang mibulag siya sa grupo aron pagtubag sa call of nature, gisundan ko siya nga misulod sa CR.
Tsug! Tsug! Tsug! Tsug! Sa walay paglangan, gibirahan ko si Verle gamit ang akong armas nga may silencer.
Ingon sa misayaw si Verle sa kasakit nga naigo sa akong pagpusil. Unya nahagba siya sa salog nga semento sa CR ug naglunang sa kaugalingon niyang dugo. May dugo nga migawas sa iyang baba ug ilong.
Nagginhawa pa siya dihang nagpaduol ko sa iyang nahimutangan. Apan naglisod na siya pagginhawa. Misiga na ang iyang mga mata.
Dihang nagbarog na ko sa iyang tungod, akong gitangtang ang wig nga akong gisul-ob gikan sa akong ulo.
“S-Sandra....” naglisod na pagsulti si Verle. “Bu-buhi k-ka...”
Imbes motubag sa iyang gisulti, gikablit ko ang gatilyo sa gigunitan kong armas. Gipusil ko siya tumong gayod sa iyang agtang. Dihadiha mihiay-ad siya. Miting-ab ug nabugtoan na sa kinabuhi.
Midali ko’g sibat dihang naseguro ko na nga patay na si Verle.
Sa balay ni Fernan sa bukirang bahin sa siyudad sa Obic....
“Mas maayong mo-lie low una ka human mo mapatay ang tulo nimo ka rapist,” nagkanayon ang lider sa mga vigilante. “Nakaseguro kong naukay na karon ang katawhan ug nag-alerto na sab ang kapolisan.”
Misanong ko sa sugyot ni Fernan. Nakasabot ko nga ang iyang gisugyot alang ra sa akong kaayohan. Aron dili ko mameligro.
Usa ka buntag niana, sayong namiya sila si Bredhart sa balay. Nakahigayon hinuon mi si Fernan pagtagay sa lawasnong kalipay. Tugob sa kainit ang among pagpinarayganay. Tumang kalalim ang akong nasinati dihang nagkadungan mi pagsangko sa kinapungkayan sa himaya.
“Asa man to sila si Bredhart?” Gipangutana ko si Fernan dihang mihunas na ang kakutas nga akong gibati human sa among panaghilawas.
“May tumbahon sila karon,” maoy tubag ni Fernan. “Usa ka kawatan ang ilang prospect. Nadakpan siya kay nangawat og kable sa usa ka telecommunications company. Mogawas siya karon sa bilanggoan human makapiyansa maong atngan siya nila ni Bredhart!” -- Sumpayan pa