Kilometro 35

Gula 43

Si Fernan misugilon kanako nga usa ka trahedya nga nahitabo sa iyang pamilya ang nagtukmod kaniya pagsul-ob sa maskara sa usa ka vigilante. Usa ka masakit nga pagsulay sa iyang kinabuhi ang lintunganay’ng hinungdan nga gikumkom niya ang balaud sa iyang mga kamot.

Biktima diay sa bangis nga mga kriminal ang iyang asawa. Gikan nga nag-shopping sa usa ka mall ang iyang asawa nga three months pregnant na niadtong higayona. Mosakay na unta ang iyang misis og taxi dihang gi-hold up kini sa tulo ka tawo nga pulos armado.

Dihang nagdumili ang iyang asawa paghatag sa kuwarta ug cellphone niini ngadto sa mga hold-aper, gipusil sa walay kukaluoy ang iyang asawa sa bangis nga mga kriminal. Dead on arrival ang iyang asawa sa tambalanan nga gidad-an niini. Naamong sa kamatayon sa iyang asawa ang bata sa sabakan niini nga maoy unang bunga sa ilang kaminyoon.

“Sakit kaayo alang nako ang maong hitabo,” nagkanayon si Fernan human isugid kanako ang masakit nga hitabo nga midangat sa iyang asawa.

“Bisan kinsa pa tingali ang mabutang sa imong dapit, sakitan gayod, Fernan,” giingnan ko siya.

“Mao kini hinungdan nga gipangunayan ko ang pagsilot sa mga makasasala. Nadakpan man tuod sila sa mga awtoridad apan nakapiyansa ra sab. Mao kadto nga sa paggawas nila sa bilanggoan, giluthang namo sila.”

“Mao kadtoy angay kanila. Ang sama kanila dili angay pasanayon dinhi sa kalibotan.”

Unya kalit lang nahimong limbatianon ang higayon. Tungod ba kaha sa akong pagsimpatiya kang Fernan sa masakit nga hitabo sa iyang pamilya, gigakos ug gihagkan ko siya aron paghupay sa iyang mga kasakit.

Fernan is a virile man. Miresponde dayon siya sa gipadayag kong kainit sa pagbati. -- Sumpayan pa