Sukli sa utang

Gula 204

Nianang pagkaugma, akong gitawagan ang telephone number nga gihatag ni Troy nako. Nagpasalamat ko sa hilom nga siya gyud ang nakatubag sa akong tawag sa telepono.

“Magkita ta unya,” giingnan ko siya. “Importante kaayo.”

“Nga-ngano man?’ Nakasukna siya. “May problema ba?”

“Unya ko na lang ikaw pasabton sa tanan kun magkita na ta.”

“Okey. A-asa man ta magkita? Unsang orasa?”

“Sa LRT station sa Baclaran ta mag-abot. Sa may hagdanan gyud. Mga one o‘clock gyud.”

“Areglado. Moabot ko sa maong oras.”

Human naplansa ang among sabot, gibutang na nako ang awditibo. Nangandam dayon ko alang sa panagkita namo ni Troy.

Menos kinse para ala una nahiabot na ko sa Baclaran. Milahos ko sa estasyonan sa LRT. Sayo pa ang akong pag-abot apan nag-una na nako si Troy sa dapit nga among gikasabotan nga mag-abot. Sa akong pagdanga-danga, nakita ko dayon siya nga nagbarog duol sa ubos nga bahin sa hagdanan paingon sa taas sa LRT.

“Dili ta dinhi mag-estorya,” giingnan ko si Troy. “Mangita tag dapit nga duna tay privacy.”

“Mi-check in mi sa usa ka motel sa F.B. Harrisson St. Pagsulod namo sa mabugnaw’ng lawak, mopadayag na unta ko ni Troy sa akong tuyo. Apan kalit lang ko niyang gigakos ug gihagkan. Wala ko makatutol sa iyang gihimo. Mipaanod hinuon ko sa bul-og sa kahinam.

Gisaw-an namo pagtagay ang kalalim sa lawasnong kalipay. Mihari sa sulod sa lawak ang among mga hangos ug agumod nga mosapaw matag karon ug unya sa hinay nga andar sa aircon.

Sa makadiyot nahikalimtan nako ang tinud-anay kong tuyo sa pagpakigkita kang Troy.

“Matud mo may importante kang tuyo nako?” Gikan ni Troy human sa makutas namong bugno sa kama.”

“Tinuod kana,” laktod kong tubag.

“Bahin sa unsa man kana, Editha?”

Nanghupaw una ko sa wala pa motubag.

“Pipila ka adlaw gikan karon di na tingali ta magkakita.” -- Sumpayan pa