Gula 39
Wala gyud ko masayop sa akong pagtuo. Maoy rumbo ni Kurt ang Vallecera Centrum building diin nag-opisina ang iyang inahan. Nagpadayon ko pagsunod niya sa igong gilay-on. Dili ko gayod siya lung-an sa pagsunod hangtod nga makakita ko’g higayon sa pagluthang kaniya.
Misulod siya sa main lobby sa Vallecera Centrum building. Misunod sab ko’g sulod. Maayo gani kay wala madiskobrehi sa guwardiya nga nagrekisa nako ang akong armas nga gitagoan nako dapit sa akong bugan.
Nakasakay na si Kurt sa elevator sa akong paghimuntog sa mezzanine sa Vallecera Centrum. Didto na lang ko moagi sa hagdanan paingon sa third floor diin nahimutang ang law office sa inahan ni Kurt.
Paghimuntog nako sa third floor, mao gyuy pagsulod ni Kurt sa buhatan sa iyang inahan. Wala siya makakita nako kay nakaipli man dayon ko. Pero bisan pag iya kong nakit-an, dili siya makaila nako tungod kay nagsul-ob man ko sa akong takoban.
Naghulat ko nga mogawas si Kurt gikan sa law office sa iyang inahan. Nagtuo kong dili siya magdugay sa sulod. Posibleng igo lang siyang mangayo og kuwarta sa iyang inahan ug mobalik na siya ngadto sa bilyaran diin nagpaabot sila si Sheldon kaniya.
Wala dangtig dugay, naabli ang pultahan sa opisina sa iyang inahan. Nakita ko ang paggawas ni Kurt. Mipaingon dayon siya sa elevator. Dihadiha migawas ko sa akong gipasalipdan ug milakaw paduol kaniya. Wala ko magpasabot nga siya’y akong tuyo. Nagpakaaron-ingnon ko nga mosakay sab sa elevator nga mao say iyang gihulatan.
Pagkaabli sa pultahan sa elevator, miuna si Kurt pagsakay. Misunod ko. Maayo kay kami rang duha sa sulod sa elevator. Makahigayon gyud ko sa akong tuyo kaniya nga mao ang pagpanimalos.
Dihang nasira na ang elevator, gilanit nako ang armas nga may silencer gikan sa akong bugan! -- Sumpayan pa