Sukli sa utang

Gula 200

Dihang nakagawas na mi sa hotel, misugyot si Troy nga mangisnak una mi. Misugot ko. Nanabok mi sa pikas tampi sa dalan diin nahimutang ang usa ka desenteng snack bar.

“Kanus-a ta magkita pag-usab?” Gipangutana ko ni Troy samtang nangisnak na mi.

“Di ko makaseguro,” maoy akong tubag. “Depende kun kanus-a ko makalugar.”

“Hatagi lang ko sa imong telephone number. Hatagan ko sab ikaw sa akong telephone number aron magkakontakay ta.”

“Mas maayo pa tuod. Pero ayaw panawag sa ba’y kun buntag sayo, ha, kay naa pa nianang orasa ang akong bana. Mga pasado alas 10 puyde ka nang manawag.”

“Okey.”

Ug naghinatagay mi sa tagsatagsa namo ka contact number sa landline. Wala madugay, nanggawas mi sa snack bar.

Pagkasunod adlaw, nanawag si Troy sa condo unit nga gipuy-an namo ni Ferdinand. Mao pa lang gyu’y pagkahuman nako’g kaligo niadtong tungora. Paggawas nako sa banyo, maoy akong nadungog ang bagting sa telepono sa may sala maong gidali ko kini’g tubag.

“Makalugar ka ba unyang palis?” Tingog ni Troy didto sa pikas tumoy sa linya sa telepono.

“Ngano man?” Gisumbalik ko siya’g pangutana.

“Magkita ta. Sa Uniwide lang gihapon. Mga 1:30.”

“Paninguhaon ko nga makaadto.”

“Seguroa lang god.”

“O, sige...”

Tuod man, pagkapalis mibiya ko sa condo unit. Nagpahatod ko’g taxi ngadto sa Uniwide sa Parañaque. Sa entrance sa nahisgotang establisamento nga nag-atubang habig sa Baclaran, nagbarog ko samtang nagpaabot nga mahiabot si Troy.

Nag-una na diay nako si Troy. Migawas siya sa Uniwide pagkakita niya nga nagbarog-barog ko sa gawas.

Gidala ko ni Troy ngadto sa taxi stand sa gawas sa mall. Misakay mi sa usa ka taxi nga naghulat og pasahero. Giingnan niya ang driver nga adto mi magpahatod sa Facundo St., Libertad, Pasay City. Wala koy ideya nganong adto ko dad-a ni Troy didto. -- Sumpayan pa