Kilometro 35

Gula 37

Wala madugay ang among pagsubay sa Dalandan Avenue dihang nalantawan namo sa unahan ang usa sa mga sakop ni Fernan nga nagbarogbarog duol sa usa ka eskina. Gihunongan kini ni Fernan.

Milingilingi ang sakop ni Fernan. Unya miduol siya sa among nahimutangan. Giablihan dayon ni Fernan ang bildo sa bentana sa sakyanan sa iyang tungod. Ug nakigsulti siya kang Fernan.

“Naa sa sulod sa UCV Billiard Center si Verle Juizo,” nagkanayon ang sakop ni Fernan sa tingog nga maguwang lang sa hagawhaw.

“Kinsay iyang mga kauban?” nangutana si Fernan.

“Kaganina sa akong pagkontak nimo, siya ra untang usa. Bag-o lang gyung nahiabot ang iyang mga barkada nga gipangulohan ni Sheldon Abrigos. Kompleto na ang ilang grupo.”

“Bantayi lang gyud ninyo. Dili ta mopugos kun wa gyu’y kahigayonan. Di ko gustong mopalpak. Basta bantayi lang gyud ninyo si Verle.”

“Yes, Boss.”

Human sa panagsulti nila ni Fernan ug sa iyang sakop nga vigilante, gipadagan niya ang sakyanan. Milahos mi sa unahan. Miliko siya sa usa ka eskina ug mihunong sa daplin. Wala niya pagnga ang makina sa awto.

“Anhi ta dinhi maghuwat sa tukmang higayon, Sandra,” niya pa.

Wala madugay, may nanawag sa cellphone ni Fernan. Kadiyot ra kaayo ang ilang panagsulti. Mora’g igo lang gikuha ni Fernan ang kasayoran gikan sa iyang sakop bahin sa grupo ni Sheldon nga among gipanid-an.

“Migawas kuno si Kurt Tumeldon sa bilyaran,” giingnan ko ni Fernan. “Ug nia siya paingon sa atong nahimutangan.”

“Maayo hinuon kun mao kana, Fernan.” giingnan ko sab siya.

“Unsay imong hukom karon?”

“Si Kurt ang akong unahon!” -- Sumpayan pa