Gula 36
Pagkagabii, gi-briefing ni Fernan ang iyang mga sakop nga vigilantes. Iyang gipasabot kanila ang plano sa operation nianang pagkaugma nga mao ang paglikidar kang Verle Juizo. Gidetalye sa lider sa mga vigilantes ang katibuk-ang master plan sa operation.
Pagkaugma, milihok gilayon ang mga sakop ni Fernan. Ang ilang tumong mao ang hang-out nila ni Sheldon ug mga barkada. May nagsakay og motorsiklo. Si Bredhart nagsakay sa getaway car nga maoy akong sakyan sa akong pag-ikyas human ko mapatay si Verle.
“Andam ka na ba, Sandra?” Gipangutana ko ni Fernan samtang nagsakay mi sa iyang awto nga gipangunayan niya pagmaneho.
“Kaganina ra kong andam, Fernan,” laktod kong tubag.
“Good! Maghuwat lang tas tawag sa akong mga sakop nga maoy nagsunod-sunod karon nila ni Sheldon ug sa iyang mga barkada, lakip na si Verle Juizo nga maoy atong target karong adlawa.”
Pag-abot namo sa Anglit Street sa downtown sa siyudad sa Obic, nangita si Fernan og dapit nga kaparkingan. Unahan og diyotay sa usa ka sinehan, gipadaplin og maayo ni Fernan ang among gisakyan.
Paglabay sa pipila ka gutlo, dihay nanawag sa cellphone ni Fernan. Usa sa iyang mga sakop. Gihinabi niya kini sa makadiyot.
“Nakit-an sa akong mga sakop si Verle Juizo,” nagkanayon si Fernan. “Atua siya sa usa ka bilyaran sa Dalandan Avenue.”
“Kauban ba niya sila si Sheldon?” Nangutana ko.
“Si Verle rang usa ang nakita sa akong mga sakop.”
Gipadagan dayon ni Fernan ang awto nga among gisakyan. Miliko mi sa usa ka eskina ug unya mao nay among gisubay ang Jerusalem Street nga milagbas ngadto sa Dalandan Avenue.
Wala madugay, nagsubay na mi sa Dalandan Avenue. -- Sumpayan pa