Gula 196
Pagkaugma, miadto ko sa Uniwide aron pagtuman sa gikasabotan namo ni Troy. Mas una kong nahiabot kay kaniya. Hinuon, wala sab ko magdugay sa pagpaabot niya. Mitunga lang siya nga wala ko damha gikan sa akong luyo. Naigking gani ko dihang midapat ang iyang usa ka kamot sa akong abaga. Nagtingsi siya sa akong paglingi.
Sulod sa Uniwide, nangaon mi sa usa ka fastfood outlet. Siya’y nibayad sa among gi-order. Napanid-an ko nga mora’g kuwartahan sab si Troy. Misantop sa akong hunahuna nga basin og duna pa siya’y laing raket gawas sa iyang pagka-airport police. Kay sa akong nasayran, dili man kaayo dako’g suweldo ang airport police. Busa posible gyud nga may lain pa nga raket si Troy.
“Maayo gani kay wa ko nimo indiyana sa atong sabot,” nagkanayon si Troy samtang nangaon mi.
“Dili nako batasan ang pagpangindiyan sa tawo nga akong kasabot,” giingnan ko siya.
“Mao kanay gusto ko sa babaye. Kana bang malauman.”
“Unsa ba gyu’y tuyo nimo nako?”
“Unya ko na tubaga kanang maong pangutana. Mangaon una tag tiwas.”
Mitibawas mi’g pangaon.
“Karon sultihi na kos tinuod,” giingnan ko si Troy dihang nakahuman na mi’g kaon. “Unsa ba gyud ang tinud-anay mong tuyo nako?”
“Well,” ni Troy pa. “Moprangka na lang ko, Editha. Ang tinuod, may interes ko nimo.”
“U-unsay buot mong ipasabot?”
“Type nako ang imong beauty.”
“Kana lang?”
“Ang imong pagka-ikaw. Tanan...”
Mipahiyom ko’g hilaw.
“May kataw-anan ba sa akong gisulti?” nakapangutana si Troy.
“Wa man,” nako pa. “Ikaw maoy kataw-anan.”
“Nganong nakasulti ka man og ingon niana?”
“Tungod kay dili ka makamaong mo-express sa tinuod mong tuyo. Daghan ka pa’g pasumbingay. Hilig ka’g liko-liko nga naa man untay laktod.”
Wala motingog si Troy. Napihaw ang iyang nawong.
“Angkona na lang, Troy,” nako pa, “nga gusto ka’g sexual pleasure uban nako aron magkasinabot dayon ta.”
Nahatutok si Troy nako. -- Sumpayan pa