Sukli sa utang

Gula 195

Nakalitan ko sa gisulti ni Troy. Wala dayon ko makatubag sa iyang pangutana. Natugkad nako nga may interes siya nako.

“Mahimo bang magkita ta pag-usab ugma human ning atong panaghimamat karon, Editha?” misukna si Troy.

“Nga-nganong makigkita ka man nako?” Gisumbalik ko siya’g pangutana. Minyo na baya ko.”

“Dili importante para nako ang imong civil status. Gusto lang kong makigsuod nimo.”

“Sa unsang hinungdan?”

“Ingon gyud ko ini. Ganahan kong makabaton og daghang mga higala, labinag sama nimo nga guwapa.”

Wala ko motingog. Nasayod kong bulatik ang gisulti ni Troy. Pero tinuod man sab nga guwapa ko. Kun dili pa ko guwapa, dili unta daghan ang mga lalaki nga mipatol nako.

“Ugma sa gabii, Editha,” ni Troy pa. “Makahigayon ka ba?”

“Dili ko makalugar sa gabii,” giingnan ko siya.

“Aw, anytime nga bakante ka.”

Naghunahuna ko sa makadiyot.

“S-sa buntag na lang ta magkita,” matud ko pagkilab sa pipila ka gutling.

“Okey,” nagkanayon si Troy. “Asa man?”

“Sa Uniwide sa Tambo, Parañaque City. Mga 10:30.”

“Sige.”

Naplansa ang among sabot.

Nianang pagkagabii, wala dayon ko makatulog. Naghagok na si Ferdinand nga naghigda sa akong tupad. Nakatulog dayon siya human sa among lovemaking session. Pero ako nagpabiling nagpitawpitaw ang mga mata nga nagtutok sa kisame nga nadan-agan sa kuwap nga kahayag sa lampshade.

Ang akong gihunahuna mao si Troy. Alang nako, makahuloganon kaayo ang among casual acquaintance kaganinang adlawan didto sa Quiapo. Mora bag usa ka blessing in disguise para nako ang gibuhat sa snatcher nga paglabni sa akong shoulder bag kay mao man kadtoy nahimong taytayan aron magkahimamat mi si Troy.

Excited kaayo kong naghunahuna sa among sabot nga magkita ugma. Wala ko kasabot nganong mibati ko’g ingon ini. Mora bag inanay na sab kong gibuntog sa akong weakness. -- Sumpayan pa