Gula 33
Dihang napahimutang na ko’g maayo sa ibabaw sa kama, gidaitlan dayon ni Fernan sa mainiton niyang mga halok ang akong ngabil. Misugod sab dayon pagkiat ang iyang mga kamot nga nanghinol sa sensitibong mga parte sa akong lawas. Mora ko’g gikuryentehan sa iyang gihimo.
Ang kahangol sa hinagkan ni Fernan nagtug-an kanako nga taudtaod na siyang wala makagamit og babaye. Wala hinuon ko magtuo nga wala pa gayod siya makatagamtam og himaya sa usa ka babaye sukad masukad. Apan ang kainit sa iyang mga halok maoy timaan nga gihidlaw na siya sa usa ka babaye. Nga taudtaod na siyang nalutas sa lawasnong kalipay.
Kadali ra ming nanginit.Gigamhan na ko sa tumang kahinam sa panaghilawas.
Pagkilab sa pipila ka daklit, nagsaka-kanaog na si Fernan sa ibabaw sa naghayang kong lawas.
Unya miagumod ko kay daw misuyla na ang bul-og sa kalalim nga akong gibati!
Hangtod nga nahanduraw ko ang akong kaugalingon nga daw nakatungtong sa taluktokan sa pungkay ug misangko ang akong alimpulo sa tiyan sa langit. Daw nanganinipot ang akong panan-aw sa tumang kalalim. Gipiyong ko’g balik ang akong mga mata aron pagsinati sa after glow.
Kalahi sa akong gibati! Lahi kay sa niadtong higayon nga gitabangan ko’g lugos nila ni Sheldon. Lunlon kalipay ug kalalim ang akong nasinati sa pagpakigtagay nako kang Fernan sa lawasnong kalipay.
Una ko kining kasinatian sa pagpakighilawas nga dili supak sa akong kabubut-on. Wala ko magmahay sa pagtahan ko sa akong kaugalingon kang Fernan kay naangkon ko man ang hingpit ug lunsay nga kalipay. Dugang niini, mora ko’g nakasinatig stress debriefing human sa nightmare nga nahitabo sa akong kinabuhi.
“Nganong imo kining gibuhat, Sandra?” Gipangutana ko ni Fernan dihang nihunas na ang kakutas nga iyang gibati.
“Nalipay lang ko, Fernan,” giingnan ko siya.
“Ngano man? Unsay nakapalipay nimo?”
“Tungod sa kalamposan sa una kong lakang sa pagpanimalos sa mga tawo nga nakasala kang Orville ug kanako.
“Unsa may koneksiyon niana sa imong pagtugyan sa imong pagka babaye ngari kanako?”
“Usa kini ka paagi sa pagpasalamat, Fernan.” -- Sumpayan pa