Sukli sa utang

Ang nahitabo tali kanamo ni Jomar nasubli sa makadaghan. Wala gyod intawo'y kalibotan si Ferdinand nga gawas niya nga akong bana, nakigdula pa gyod ko sa laing team. Nagtuo tingali intawon siya nga nagtinarong ko sa among kaminyoon. Nagmata lang siyag morning!

Nasayod kong sayop ang akong gibuhat. Pero dili nako kabalibaran si Jomar sa higayon nga magkinahanglan siya nako. Dili ko makahimo sa pagbalibad niya sa higayon nga manawag siya nako kay gusto siyang makigkita nako. Sa matag higayon nga magkita mi, mosangko gyod ming duha sa usa ka pribadong lawak aron didto tilokon namo ang mga gutlo pagtagbaw sa pagdimdim sa dugos sa lawasnong kalipay nga saw-an namo pagtagay.

Gusto kong patuohon ang akong kaugalingon nga minyo nako ug lahi na ang akong kinabuhi kay sa kaniadto sa dalaga pa ko. Niadtong dalaga pa ko, wala kaayo ko'y kabalaka bisan nakiglambiyong ko sa lainaling mga lalaki. Lahi kaayo sa naminyo na ko kang Ferdinand kay maisip na man ko nga exclusive nang para niya na lang. Binding kaayo ang among panagtipon labina kay gipakaslan man ko niya sa civil ug sa Simbahan.

Pero dili gyod ko makahimo pagpiog sa gahom sa kahuyang. Mao gyo'y numero uno nakong weakness ang bahin sa sex. Bisan og wala magkulang si Ferdinand nako bahin sa panaghilawas apan gusto pa gyod kong maka-sideline sa lain. Ug si Jomar ang nahimo kong katambayayong sa akong pagluib sa kaminyoon namo ni Ferdinand.

Usa niana ka higayon, may nanawag sa telepono atol nga diha si Ferdinand sa condo unit nga among gipuy-an. Wala siya mo-duty kay naglain ang iyang lawas. Siya'y nakatubag sa nanawag. Pero wala motubag ang nanawag didto sa pikas tumoy sa linya sa telepono sa dihang iya na unta kining pakigsultihan. Napikal si Ferdinand maong gipusdak niya ang awditibo.

Maayo ra sab nga wala motingog ang nanawag. May ideya ko kun kinsa kadto. Hugot ang akong pagduda nga si Jomar ang nanawag ug akoy buot niyang pakigsultihan.

Nianang pagkaugma, mi-report na si Ferdinand sa iyang trabaho. Igo lang siyang nakabiya sa condo, mibagting ang telepono. Gidali ko kini pagtubag. Si Jomar ang nanawag. Mao gyo'y una kong gipakisayran kaniya kun siya ba ang nanawag kagahapon nga wala motingog dihang si Ferdinand maoy mitubag. Miangkon si Jomar nga siya ang nanawag.

"Wrong timing bitaw ko gahapon," ni Jomar pa. "Wa ko magdahom nga diha diay ang imong bana." (Sumpayan pa)