Kining sugilanona maoy apas-sumpay (sequel) sa akong sugilanon nga migula sa Banat News niadtong Nobiyembre 24, 2008. Gikan sa Baybay, Leyte, didto ako moagi sa Ormoc sa maong lalawigan. Misakay ako og dyip nga pasaheroan. Pag-abot nako didto mopaingon dayon ako sa pantalan aron pagsusi kun duna bay lansa nga mobiyahe niadtong adlawa. Maoy akong nahitangkaan ang usa ka lansa nga naglandig diha sa piyer. Namuaypuay ang akong kalipay.
May usa ka tawo naglingkod sa usa sa mga teheras nga naglumbay diha sa lansa. Giduol ko dayon ang maong tawo.
"Bay, molarga ba ron kining lansaha?" mipakisayod ko.
"Dili pa raba da," matud sa tawo.
"Ngano man?"
"Tungod kay anhi dinhi mopalabay sa Pasko ang kapitan karong adlawa ugma ra mopaingon kining lansaha ngadto sa Cebu.
Dihadiha, mipuli ang kaguol nga mipig-it sa akong dughan.
Midason pagsulti ang tawo. "Ayaw la’g kaguol ug kabalaka kay puwede kang makahigda sa usa sa mga teheras dinhi."
"Daghang salamat sa imong gitanyag nako," nako pa nga mipahiyom.
Gipaliraw dayon nako ang akong mga mata sa palibot. Unya, maoy nabantang sa akong panan-aw ang usa ka tawo nga naglakawlakaw sa pantalan. Giduol ko ang maong tawo. Gilayon nakamay-ong ako sa panagway ug pamarog niini.
"Mer!" Nakasiyagit ako sa tumang kalipay.
"Dong!" madasigon usab ang iyang tubag.
Niining tungora gikakita ko si Elmer, usa sa akong mga higala nga taga Cebu usab.
Sa among panag-estorya, akong nasayran nga dugay na si Elmer nga miistar didto sa Ormoc. Usa siya ka piyanista. Uban sa iyang banda, sila ang nagduyog sa manganta sa estasyon sa radyo DYRR. Didto sila magpuyo sa usa ka hotel nga kasikbit sa naasoy'ng radio station.
Sa akong bahin, gisultian ko ang akong higala nganong nahipunta ako didto sa Ormoc.
"Samtang magpaabot pa ikaw sa lansa nga molarga na unya padulong sa Cebu, dinhi lang una ka mopuyo sa hotel nga among giistaran."
Sa pagkadungog ko sa sulti ni Elmer, dili matukib ang kalipay nga migahom kanako ug nakaingon ako sa akong kaugalingon: "Gamay ra gyud diay ang kalibutan!" (Kataposan)