Sukli sa utang

Gula 190

Human sa taudtaod nga paghunahuna, nakabunlot ko’g maayong alibi aron pagkombinser ni Ferdinand nganong gusto kong mamalik na mi ngadto sa Manila.

“Enjoy baya ko dinhi,” giingnan ko siya. “Pero di ba twelve days ra man ang gi-file nimong vacation leave sa kompaniya nga imong gitrabahoan?”

“Aw,” ni Ferdinand pa nga ingon sa naalimatmatan. “Tuod, no? Nalimot man diay ko mahitungod niana.”

“Nalingaw ka man god og maayo sa atong pagbakasyon. Hapit ka na lang hinuon makalimot bahin sa imong trabaho didto sa Manila.

“Maayo gani kay naa ka nga mipahinumdom nako. Bentaha gyud diay kun dunay asawa, da.”

Unya iya kong gihagkan. Ang mao niyang initiative mao hinuon ang nahimong pabilo sa among pagpanginit. Sa wala pa mi mangatulog sa hingpit, gitambalan namo ang kainit sa among kalawasan. Seksuwal!

Pagkabuntag samtang namahaw mi, gipahibalo na ni Ferdinand si Nanay Isabel nga mamalik na mi sa Manila inigkaugma.

Tuod man, mibiyahe gyud mi si Ferdinand paingon sa Manila segun sa among giplano. Pag-abot namo sa kaulohan, pagkaingon ugma, mi-report dayon si Ferdinand sa iyang trabaho kay napupos na man ang dose ka adlaw niyang vacation leave.

Balik na sab ko sa naandan kong routine sa condo unit nga gipuy-an namo ni Ferdinand sa Alabang. Mora ko’g baboy nga gibuhi aron patambokon. Kaon ug katulog ray akong gibuhat. Kun bation og kalaay, motan-aw og salida sa TV o DVD. Usahay mag-malling.

Usa ka buntag niana, mao pa gyu’y pagbiya ni Ferdinand sa condo paingon sa trabaho, mibagting ang telepono. Wala koy ideya kun kinsay nanawag pero gipunit lang gyud nako ang awditibo.

“Hello?” giingnan ko ang nanawag.

“Kumosta ka na?” Tingog sa usa ka lalaki ang akong nadungog didto sa pikas tumoy sa linya sa telepono.

Sinati nako ang tag-iya sa maong tingog. Si Jomar.