Kilometro 35

Gula 28

Gipalihok dayon ni Fernan Rivas ang iyang mga sakop. Ilang gisunod-sunod si Ervin aron pagpangitag higayon nga maluthang ko siya. Ang mga sakop ni Fernan nagsakay sa laing sakyanan. Kami sab si Fernan ang nag-uban og sakay sa kaugalingon niyang kotse nga walay plate number.

Nasundan sa mga sakop ni Fernan si Ervin nga misulod sa usa ka mall sa siyudad. Misulod kini sa usa ka desenteng kan-anan. Didto na diay sila si Sheldon sa sulod sa maong kan-anan, nagpaabot kaniya.

“Bantayi lang gyud siya ninyo,” nagkanayon si Fernan ngadto kang Bredhart nga gikasulti niya pinaagi sa cellphone. “Kinahanglang makuha ta siya ning higayona.”

Nagpabilin lang una mi si Fernan sulod sa sakyanan nga gi-parking sa lapad nga parking area sa mall. Nagpaabot mi sa sunod nga pagkontak ni Bredhart. Gipaabot namo ang instruksiyon gikan kang Bredhart.

Giandam ko nang daan ang akong kaugalingon. Gisul-ob ko na ang akong takoban. Nag-wig ko aron dili ko mailhan ni Ervin sa higayon nga magkaatubang na kami. Gusto ko siyang surpresahon sa among panag-atubang unya.

Wala dangti’g dugay, mikontak pag-usab si Bredhart sa cellphone ni Fernan. Human sa hamubo nilang panagsulti, miatubang si Fernan kanako.

“Migawas kuno si Ervin sa kan-anan nga gisudlan nila ni Sheldon Abrigos,” ni Fernan pa. “Gisundan siya karon nila ni Bredhart nga misaka ngadto sa ikatulong andana sa mall.”

“Unsay buhaton ta karon?” gipangutana ko si Fernan.

“Molihok na ta.”

Nanganaog mi sa awto ug misulod sa mall. Sanglit maayong pagkatago ang among mga armas, nakasulod mi sa dakong kasayon sa mall bisan sa hugot nga pagrekisa sa mga security guard nga nagbantay sa entrance sa maong edipisyo. -- Sumpayan pa