Gula 188
Pagkabuntag, nabaniog dayon ang pag-abot namo ni Ferdinand sa ilang dapit. Ang barangay Tambo usa pa ka remote area niadtong panahona. Maingon tang nabiyaan sa buhilaman ug wala maatiman sa mga namunoan.
Sa dapit nga sama sa barangay Tambo, halos nagkailhanay ang tanang mga molupyo. Dili ikahibulong nga dali rang mokaylap kun dunay balita nga makainteres nila. Daghan kaayo’g mga paryente si Ferdinand sa Tambo nga midugok sa balay ni Nanay Isabel pagkasayod nila sa among pag-abot.
Akong namatikdan nga welcome kaayo ko sa mga kabanay ni Ferdinand. Nahinangop kaayo silang nakakita ug nakahimamat nako bisan dili kaayo mi magkasinabot sanglit Binisaya man ang ilang sinultihan ug ako Bicolana. Pipila ra sab nila ang hanas nga mosulti’g Tinagalog.
Ang ako lang namatikdan nga mora’g wala malipay sa akong pag-abot mao si Nanay Isabel. Wala na hinuon ko mahibulong kun nganong naingon siya niadto. Daan na man kong nakamatikod niadtong among panagkita didto sa Manila nga wala siya’y gustong gipangasawa ko sa iyang anak.
Wala lang nako hatagi’g dakong gibug-aton ang dili maayong tinagdan sa inahan ni Ferdinand. Total, dili man mi magdugay sa Bohol. Human unya sa pista sa Tambo, apurahon na nako si Ferdinand nga mamalik na mi ngadto sa Manila.
Miabot ang bisperas sa kapistahan ni San Isidro Labrador, ang patron sa barangay Tambo, Mabini, Bohol. Nianang pagkagabii, may disco nga gipahigayon sa may basketbolan nga nahimutang sa sentro sa barangay. Mitambong mi si Ferdinand sa disco.
Pagkaugma nga mao nay kahulogan sa pista, naudtohan mi si Ferdinand og kamata. Kaadlawon na man god ming nahiuli gikan sa diskohan. Mibangon na lang mi si Ferdinand human mi pahibaw-a ni Toni nga iyang manghod nga nangabot na ang iyang mga higala kaniadto nga nangokasyon pagpamista aron makigkita niya human masayod sa iyang pag-abot kuyog nako nga iyang asawa. Sa sala, gi-entertain ni Ferdinand ang iyang mga higala. Gipaila sab ko niya ngadto kanila.
“Wa pa diay moy anak, Bay?” nangutana si Pedring.
“Wa pa lagi, Bay,” mapaubsanong tubag ni Ferdinand. “Wa pa tingali nako matultoli ang tukmang ig-anan.”
“Way bale kun way anak sa sulod,” ni Ondoy pa usab. “Basta naay daghan sa gawas.”
Morag nanglipaghong ang nawong ni Ferdinand. -- Sumpayan pa