Gula 182
Labihang lipaya ni Jomar nga misugot kong magkuyog mi sa pagpanan-aw og sine. Wala tingali siya magdahom nga mosugot ko sa iyang awhag. Mahimong komedya ra tong iyaha pero iya na lang gitininuod sa dihang wala ko mobalibad.
Ako mismo wala makasabot sa akong kaugalingon. Naglibog ko kun nganong misugot ko nga magkuyog mi’g panan-aw og sine bisan bag-o lang kaming nagkaila. Usa pa gyud ako ka babayeng minyo ug dili na unta angay nga makighugoyhugoy pa ko sa laing lalaki kay may bana na man ako.
Pero morag wala ko sa maayong panghunahuna sa dihang mitando ko sa gisulti ni Jomar. Ang ako lang nasabtan mao nga gusto ko siyang ikauban sa pagpanan-aw og sine.
Wala mag-usik og panahon si Jomar. Nangita siya’g kaparkingan sa taxi nga iyang gimaneho. Dihang napahimutang na’g maayo ang sakyanan, mikanaog siya ug midali paglipot sa luyo sa sakyanan aron ablihan ang pultahan sa tungod sa akong gilingkoran. Nanaog sab dayon ko.
Misulod mi sa mall.
“Hain may maayo kun mangaon una ta?” Misugyot si Jomar dihang natungod na mi sa usa ka fastfood outlet.
“Busog pa ko,” giingnan ko siya. “Mamalit na lang tag snacks nga atong makaon sulod sa sinehan.”
Miuyon siya sa akong sugyot. “Miadto una mi sa supermarket sa mall aron mamalit og pang-snacks. Pagkahuman, milahos na mi ngadto sa nahimutangan sa sinehan. Si Jomar maoy mipalit og ticket sa sine. Akoy nagbuot nga ang pelikula ni Angelina Jolie maoy among tan-awon.
Samtang nalingaw kong nagtan-aw sa gisalida nga pelikula, gigunitan ni Jomar ang akong kamot samtang ang lain niyang kamot miagbay sa akong abaga samtang nagtupad mi sa pagpanglingkod. Iyang gihimashimas ang akong palad. Nasingo ko ang makalumay niyang male scent.
“Tingalig mabanwagan ta sa security guard ning sinehan,” nako pa nga mibadlong kang Jomar.
“Ayaw kabalaka,” mitubag siya. “Nagbantay man bitaw ko.”
Ambot ug ngano nga imbes masuko ko sa iyang pag-take advantage, ingon sa nakauyon na man hinuon ko sa iyang gihimo. Wala ko motutol ug wala ko makahimo pagsanta sa lihok sa iyang mga kamot.
Unya naigking ko dihang gihinol ni Jomar ang akong usa ka paa. -- Sumpayan pa