Kilometro 35

Gula 19

Gikasilagan ko si Sheldon ug ang iyang mga barkada. Dili ko gayod sila mapasaylo sa ilang pag-among-among nako.

Samtang naghunahuna ko sa masakit kong kasinatian sa pagpanamastamas ni Sheldon ug sa iyang mga barkada sa akong pagka babaye, naabli ang pultahan sa lawak nga akong nahimutangan.

Nakita ko ang usa ka lalaki nga misulod. Ka-look-alike niya si Tom Cruise. Mihinay siya’g paduol sa akong gihigdaan.

“Kumosta ka na?” Nangutana dayon siya dihang nahiduol na siya nako.

“Nia,” nako pa. “Luya pa gihapon. Pero maarang-arang nag diyotay.”

“Maayo hinuon kun mao kana.”

“Hain ko? Unsa ning dapit nga inyong gidad-an nako?”

“Nia ka sa akong panimalay, sa bukirang bahin sa siyudad sa Obic.”

“U-unsa?”

“Nabangalan ka nila ni Bredhart nga naglutaw sa suba. Gigapos ka sa usa ka gakit nga morag gituyo sa pagpalutaw sa suba. Wa kay panimuot nga na-rescue nila ni Bredhart.”

“K-kinsa man kana si Bredhart?”

“Kadtong nagpakaon nimo kaganina.”

“S-siya diay?”

“Oo. Ako siyang pangabaga.”

“I-ikaw? Kinsa ka man?”

“Ako si Fernan Rivas, ang pangulo sa mga vigilante nga naglihok karon sa siyudad sa Obic.”

“V-vigilantes?”

“Oo, mga vigilantes kami. Kontra namo ang mga badlongon sa katilingban. Kami responsable sa summary execution sa mga kriminal nga midagsang karon pag-ayo sa atong katilingban.” -- Sumpayan pa