Gipares sa Diyos

Usa ka adlaw niana sa sulod sa kasarangang panimalay, naglingkod sa wheeled chair si Maylinda, sa may bentana. Naglantaw siya sa gawas. Halayo ang lupad sa iyang hunahuna.

Usa ka dalaga si Maylinda, 21 anyos, putol ang iyang tuong tiil hangtod sa tuhod apan may hitsura siya. Gani matud pa ni Fred Monterola nga ilang silingan, sama siya og panagway ni Angel Locsin.

"Sa sunod adlaw birthday na nako. Magkita na gyud mi si Israel. Apan dili kaha siya ma-discourage inigkakita niya nako? Dili kaha siya motamihid inigkakita niya sa akong kahimtang?" Mga pangagpas nga nanggusod sa alimpatakan ni Maylinda.

Ang iyang pagka-inutil maoy nakapawala sa iyang gana sa kalibotan. Apan maayo na lang kay nagkateksmet ug nagkauyab sila si Israel mao nga nabanhaw pa ang iyang kadasig.

Namalik sa kaisipan ni Maylinda ang panghitabo nganong naingon siya niini karon. Unya may mga lusok sa luha nga nanubod sa iyang mga mata ug naghimo’g dalandalan sa iyang kaapingan.

"Ate Lusing, mobakasyon ko sa ilang Lolo Segundo ug Lola Mylene sa Cebu. Gimingaw na man gud ko nila ug usa pa, gilaayan na man gud kong magsige la’g yampungad dinhi’s bukid," usa ka adlaw nananghid si Maylinda sa iyang magulang nga si Lusing. Sila na lang duha ang nagpuyo sa balay kay mga ilong tuwapos na sila.

"Aw, sige gud. Basin pod diay'g makakita ka’g trabaho didto. Unya kanus-a man ka mogikan?"

"Ugma sa kaadlawon mag-atang na ko’g bus aron makasakay kos biyahe diretso sa Cebu," mapahiyumon si Maylinda.

Halayo na ang nalatas sa bus nga gisakyan ni Maylinda. Nagsubay kini sa daw tinai sa manok nga kalsada diin sa kilid hataas nga bukid ug sa pikas kilid halawom nga bung-aw.

Apan kalit nga dihay usa ka dako kaayong bato nga midahili gikan sa ibabaw sa bukid. Nangimbisog ang drayber nga makalikay apan sa kalit niyang pagliwag sa manibela nahulog ang bus sa bung-aw. Wala hinuoy kinabuhing nakalas apan daghan ang nangaangol. Usa na si Maylinda ug giputol gyud sa doktor ang iyang tuong tuhod kay nadugmok man ang bukog niini sa dihang napantok kini sa puthaw.

Sa iyang paghigawas sa ospital, aron malingaw siya, gipalitan siyag selpon sa iyang Ate Lusing ug kada adlaw palitan pod siya’g Banat News. Ug sa panid sa Banat Inbox ni Rosalie B. Vallecera namili siya sa mga nag-wanted og textmate. Ang ngalan nga Israel Bañez maoy iyang napilian. Nagkauyab sila ug misaad si Israel nga mobisita kaniya atol sa iyang birthday. Birthday ni Maylinda. May miabot apan nahingangha siya kay...

"Mao ba ni ang balay ni Maylinda Lipay?"

Maoy naatlan sa nahiabot nga mga bisita ang Ate Lusing ni Maylinda nga nanilhig sa silong. Duha ka lalake nga nangabot, parehong dul-an sa trayenta ang pangedaron. Apan ang usa nag-scratches, wala ug tuo. Bisan nagkarsones apan klaro gihapon nga gagmay kaayo ang duha ka tiil hangtod sa tuhod.

Si Maylinda nga naglantaw gikan sa may bentana matingad-on kaayo. Gipasaka sa iyang Ate Lusing ang duha ka bisita. Ug didto sa sala....

"Kining, Lin..." matud sa nag-scratches. "Nagpakuyog ko’s akong magulang kay maglisod ko’g biyahe ako ra. Mauwaw unta kong mopakita nimo tungod ning akong kahimtang apan gugma lagi nagsugo ug wa ko magdahom nga..."

"Managsama tag kahimtang, El?" Mapaubsanon nga namulong si Maylinda. "Abi mo, El, happy kaayo ko ning akong birthday ron."

"Hasta ko, Lin. Ug gipares gyud diay ta sa Diyos."

Gisaysayan ni Maylinda si Israel sa nahitabo kaniya. Gi-estoryahan sab ni Israel si Maylinda nganong normal ang iyang panglawas apan gikan sa paa ngadto sa iyang lapalapa gagmay kaayo nga morag tiil sa bata. Gipanamkon diay siya’s iyang inahan sa baki! (Kataposan)