Sukli sa utang

Kun momabdos man ko pag-usab, mao lang gihapon ang akong buhaton sa bata nga moturok sa akong sabakan. Ako kining pangunayan pag-abort, bahala nag maimpiyerno ang akong kalag. Dili ko gustog gubin. Bahala nag dili matuman ang gusto ni Ferdinand nga makabaton mig anak. Ang importante alang nako mao nga wala koy responsibilidad ug mora lang gihapon kog dalaga bisan wangwang na ang akong pagka babaye.

Gipahimuslan gyod ni Ferdinand ang higayon sa among pagbakasyon sa Baguio. Kugihan kaayo ang iyang mga takna sa paghimo og bata. Gihimo niya ang tanan sa pamasin nga momabdos na ko. Maoy kanunay namong kan-on ang mga pagkaon nga makapalagsik ug makadugang sa gana sa pagpakighilawas ug makapatambok sa iyang sperm cell ug sa akoang egg cell.

Human sa among panaghilawas, dili dayon ko niya pabangonon. Gusto niya nga magpabilin una kong maghigda human sa among lovemaking session aron kuno ma-penetrate gayod sa iyang male sex cell ang akong ovum nga maoy proseso sa pag-conceive sa human embryo. Labihan gyod kadako ang tinguha ni Ferdinand nga makabaton na mig anak.

Natapos ang duha ka semana namong bakasyon sa Baguio. Namauli na mi sa Manila. Pagkaugma, mibalik nag report si Ferdinand sa iyang trabaho. Misugyot kadto siya nga mosuhol mig katabang nga maoy akong ikauban sa condo unit nga among gipuy-an aron dili na ko mangunay pagbuhat sa mga buluhaton sa balay. Gusto man god ni Ferdinand nga dili ko mahago pag-ayo sa mga buluhaton aron pagseguro nga magsabak na gyod ko sa among anak.

Pero wala ko mosugot sa giplano ni Ferdinand. Wala ko magkinahanglan og sulugoon sa balay sanglit dili man bug-at ang mga buluhaton. Makasamok lang nako ang usa ka sulugoon nga motipon og puyo uban namo. Basin mahimo unya kining sagabal sa akong mga plano.

Misalir gyod ang pagbakasyon namo ni Ferdinand didto sa Baguio. Paglabay sa dul-an sa duha ka bulan, nakamatngon ko nga wala na motungha ang akong regla. Niini, nagduda ko nga aduna nay embryo sa akong sabakan. Mao nga sa wala pa masayri ni Ferdinand nga mabdos ko, hilom nakong gi-abort ang kinabuhi nga miturok sa akong sabakan. Morag sayon na lang kaayo alang nako ang pagkutlo sa kinabuhi sa kaugalingon kong anak. Bahala nag nahimo kong kriminal sa kaugalingon kong anak. Ang importante alang nako mao nga walay gubin ang akong kinabuhi. (Sumpayan pa)