Gula 15
Mitiliis ang tingog ni Ervin nga mitiyabaw sa kasakit gumikan sa akong pagpaak sa wala niyang dalunggan. Sa akong gibuhat kaniya, nahinumdom na hinuon ko sa daklit sa boksidor nga si Mike Tyson nga mipaak sa dalunggan ni Evander Holyfield kaniadto.
Nahabangon si Ervin ug daw nagsayawsayaw sa gibating kasakit. Ang iyang mga kauban daw mibatig kahingawa sa nahitabo kaniya. Apan nagpabilin gihapon silang nagpugong sa akong ulo, mga kamot ug mga tiil. Si Keith wala makalihok nga naggunit gihapon sa flashlight.
Dihang inanay nang nawagtang (tingali) ang kasakit nga iyang gibati, si Ervin mibalik pagpaduol sa akong gihigdaan nga semento. Tungod ba kaha sa iyang kalagot sa akong gibuhat kaniya, gigunitan niya ang akong mga buhok ug unya gidakong niya sa makadaghan ang akong ulo sa bantok nga semento. Gibati ko ang tumang kasakit sa akong ulo.
Hangtod nga wala na ko makaagwanta. Nawad-an ko sa panimuot. Wala na ko masayod sa sunod nga nahitabo nako. Wala na...!
Sa dihang naulian ko sa maayong panimuot, nakaplagan ko ang akong kaugalingon sulod sa usa ka lawak. Gipaliraw ko ang akong mga mata sa palibot sa lawak ug akong nasuta nga dili nako pamilyar ang maong lugar. Mibati dayon ko’g kalibog kun nganong mahiabot ko sa maong dapit.
Misulay kog bangon apan gipugngan ko sa kaluya. Gibati hinuon nako ang pagsakit sa akong ulo. Ako kining gihikap. Akong nahinolan ang bandahe nga gibutang sa akong ulo -- sa dapit nga morag nasamad kay nagsakit man kini. Gipangislo ko ang akong nawong.
Nahinumdom dayon kos nahitabo nako. Gi-gang rape ko ni Sheldon ug sa iyang mga barkada. Sila kaha ang nagdala kanako ning dapita?
Unya, kalit naabli ang pultahan sa lawak nga akong nahimutangan. -- Sumpayan pa