Ang Pasko ni Doming ug Lingling

Hapit na ang misa sa tungang gabii sa pagkatawo ni Jesus. Nagsibaw sa lainlaing pagbuto ang tibuok siyudad. Langas ug alegre ang nagngadto-nganhi nga mga tawo. Madungog ang mga awit sa Pasko sa bisan asang dapit. Humot ang mansanas ug ubas.

"Magdali ta, Doming. Motambong ta sa misa." Bisan hugaw ang nawong ug pamiste ni Lingling, apan madasigon siya. "Maligo pa ra ba ta."

"O lagi. Nagdali bitaw ko." Malipayon sab si Doming nga mitulod sa kariton. Gikan pa sila sa Inayawan, sa labayanan sa mga basura. Mao na kini ang ilang pangita.

"Ubay-ubay gyud ang atong masapian, Doming. Ugma na nato kini ibaligya sa junkstore ni Insek Singa."

Igo lang mitando si Doming. Naglatagaw ang iyang hunahuna.

"Kumosta na kaha karon siya, no, Ling?" Mikarat ang tingog ni Doming.

"Bitaw, da. Nakahinumdom pa kaha karon siya nato?"

Mga tiguwang na sila si Doming ug Lingling, nag-edad nag singkuwenta. Sa dugay'ng panahon sa ilang kaminyoon, wala gyod sila tugahig anak. Pulos sila nagpakabuhi sa basura. Bayinte singko ka tuig na ang milabay, nakakita sila’g bata nga gibilin sa pultahan sa kapilya sa Inayawan. Gikan sila nga namasura niadto. Gabii silang namauli sa ilang payag. Apan pag-agi nila sa simbahan, nakadungog sila og hilak sa bata. Ug sa ilang pagsusi, usa ka bag-ong natawo nga puya nga giputos sa lampin ang diha sa pultahan sa kapilya.

Nalipay ang magtiayon. Alang kanila, hinatag sa Diyos kanila ang maong bata. Ilang gisagop ang bata ug ginganlan og Emmanuel. Naningkamot sila nga mapalitan nila kanunay og gatas ang bata. Nagdako si Emmanuel sa ilang pag-amuma inubanan sa ilang pagmahal.

Singko anyos na si Emmanuel dihang nahibutho sa ilang payag ang adunahang magtiayon ug gikuha ang bata. Mga apohan diay sila ni Emmanuel, ug ang inahan sa bata ilang anak nga napamabdosan samtang nagtungha sa kolehiyo.

Sakit man, apan gipadala ni Doming ug Lingling si Emmanuel sa mga apohan. Ilang naseguro nga mahatagan si Emmanuel og maayong kaugmaon sa mga apohan niini.

"Nakalimtan na tingali kita ni Emmanuel, uy. Bata pa god siya nga nahimulag nato."

Gisundan sa pagpanghupaw ni Doming ang iyang mga pulong.

Wala na magtingog si Lingling. Kahilakon siya nga naghunahuna kang Emmanuel nga giisip gyod niya nga tinuod nga anak.

Wala pa gani sila mahiabot sa ilang payag, gisugat na si Doming ug Lingling sa usa ka ambongan nga ulitawo. Nahibulong ang magtiayon kay gigakos sila niini.

"Komusta na kamo Pa Doming ug Ma Lingling. Ako si Emmanuel." Tam-is ang pahiyom sa ulitawo.

"E-Emmanuel. Ikaw si Emmanuel?"

Hapit magkadungan pagtubag si Doming ug Lingling. Ug dihang ilang nasuta nga si Emmanuel gyod ang diha sa ilang atubangan, nagdungan sila paggakos niini.

Unya gipaila-ila ni Emmanuel si Doming ug Lingling sa iyang inahan nga si Katrina.

"Patay na ang akong mga ginikanan. Adto na kamo puyo ipon kanamo ni Emmanuel sa siyudad. Mao kini ang iyang gusto, Noy Doming ug Nang Lingling," matud ni Katrina nga nagpahiyom.

Alang kanila ni Doming ug Lingling, talagsaon ang pinaskohan nga gihatag kanila sa Diyos. Malipayon kaayo sila. (Kataposan)