Natinuod ang pahimangno

May kabuot na ko dihang kanunay kong kasab-an ni Lola Metring. Unsaon, di man gyod nako mabantayan nga dili magpares ang sinilas nga akong isul-ob.

Sama karon nga gisugo ako ni Lola sa pagpalit og asukar sa duol nga tindahan.

"Naunsa ka ba, Maritess, nga wa na man sab magpares kanang imong gisul-ob nga sinilas!"

Wala tuod magpares ang gisul-ob kong sinilas. Ang usa kolor pula, ug ang usa kolor blue. Nagdali kong mipauli ug gipares ko ang gisul-ob ko nang sinilas.

Pagka hapon, gitawag ako ni Lola Metring. Silingan lang namo siya. Biyuda na si Lola, ug ang kauban niya sa balay mao ang kamanghorang anak nga wala maminyo. Anak ni Lola Metring ang akong inahan.

"Day Maritess, di maayo ang imong kinaiya nga mosul-ob og sinilas nga di magpares. Timailhan kini nga wala kay permanenteng desisyon ug hunahuna. Wala kay permanenteng kapares sa kinabuhi ugma damlag. Busa pahimangno lang kini nimo, pag-amping na sa pagsul-ob og sinilas. Pagmatngon nga magpares gyod ang isul-ob mong sinilas."

"Oo, Lola. Tumanon ko ang imong gisulti."

Namatay na si Lola, ug dalaga na usab ako. Apan dili ko lang gyod kalikayan nga makasul-ob ko og sinilas nga dili magpares bisan unsaon ko pagmatngon. Nakaingon na lang ako sa akong kaugalingon nga kinaiya ug kabahin na sa akong pagka tawo ang pagsul-ob usahay og sinilas nga dili magpares.

Matahom ako ug nindot og lawas. Maayo sab og pangutok. Kanunay kong ma-honor gikan sa elementary, hayiskol hangtod na sa college. Daghan ang nangulitawo nako. Mga ambongan sab. Nakabaton kog hinigugma sa unang higayon sa pagtungha na nako sa third year college. Apan wala magdugay ang among relasyon. Gibulagan ko ang lalake kay wala na ko mahigugma kaniya.

Nakabaton na sab ko’g laing hinigugma. Apan mao gihapon, wala magdugay ang among relasyon. Gibulagan ko usab siya. Ug ang maong hitabo nasundan pa sa daghang higayon. Morag dili ko kontento nga mahigugma lang sa pipila ka mga lalaki. Maoy akong gusto nga daghang lalaki ang mahilambigit kanako.

Hangtod nga nakahuman ko sa college. Nakatrabaho ko’g opisina sa dakong kompaniya sa siyudad. Nakabaton og hinigugma, nga akong gituhoan nga ako gyod nga gimahal. Maong misugot ko dihang makigminyo na kanako si Patrick.

Apan wala magdugay ang among kaminyoon. Naamgohan ko nga wala ako magmalipayon uban kaniya. Nakigbulag ako sa akong bana. Nakakita ko’g laing lalake. Nakigpuyo ako kaniya. Apan mao gihapon, gibulagan ko siya kay wala na ko mahigugma kaniya.

Lain-laing lalaki ang akong gikauban sa kinabuhi sa pagpanglabay sa mga adlaw. Ug karon, tigulang na ko. Dugay nang namatay ang akong mga ginikanan. Nag-inusara na lang ako sa akong gipuy-an kay wala nay lalaki nga gikauban ko sa akong kinabuhi.

Unya, nahinumdom ako kang Lola Metring.

"Lola, natinuod gyod ang imong gipahimangno nako." Ug igo na lang ako sa pagpatulo sa akong mga luha. (Kataposan)