Kinabuhi sa siyudad

Usa ka higayon nahisuroy si Sedro sa dakbayan sa Cagayan de Oro. Mainit kaayo kay dul-an na sa duha ka semana nga walay ulan. Daghang mga tawo sa Dibisoria ang giisip nga kinapusoran sa siyudad. Ang mga tawo daw walay pagpakabana sa ubang tawo matuman lang ang naa sa ilang hunahuna para mabuhi isip siyudadnon.

Didto sa Dibisoria, nakita ni Sedro ang usa ka tawo nga nagtan-aw sa sulod sa basurahan. Ang tawo, may pangidaron na sa kapin kon kulang, kap-atan ka tuig. Nakita ni Sedro ang tawo nga miutingkay sa sulod sa basura ug yano niining gipapha kadtong nakita nga pagkaon sama sa pan ug uban pa sulod niadtong basurahan bisan kun ang pan, bahaw na kini kaayo. Nagtuo ako nga ang tawo, nalisoan og pangisip.

Unya human niini gihagdaw niya kadtong pagkaon nga diha sa sulod sa basurahan ug gisulod sa iyang dala nga sako. Ug samtang ang tawo nag-utingkay pa gayod sa ubang sulod sa basurahan, nakita ko ang daghang langaw nga naglupad-lupad palibot sa basurahan.

Human niya mahagdaw ang pagkaon diha sulod sa basurahan, nakita ko ang tawo nga mihungit niadtong mga pagkaon sulod sa basurahan. Ning mga gutloa, nakaingon ako sa akong kaulingon nga pagkapait diay sa usa ka tawo nga ingon niini ang pagpakabuhi dinhi sa kalibotan. Unsa kadaghan kining matanga sa tawo dinhi sa atong katilingban nga matawag nga morag lasangnon sa siyudad?

Gisakitan si Sedro sa sitwasyon sa tawo. Nganong naingon niini ang tawo nga naay kabos ug adunahan? Ug sa wala pa si Sedro motalikod, diha sa iyang hunahuna nga pakigsultihan ang maong tawo sa iyang pagbalik.

Dul-an sa duha ka semana ang milabay, mibalik si Sedro sa siyudad sa Cagayan de Oro sa pamasin nga makita niya ang tawo. Ang tuyo lang niya nga agnihon ang maong tawo nga motrabaho uban kaniya sa bukid didto sa iyang yuta, basin pinaagi kaniya makahupot kini’g maarang-arang nga trabaho pinaagi sa pag-uma kay sa iyang pagkasayod sa maong tawo, taudtaod na kining nanginabuhi pinaagi sa pag-utingkay sa basurahan.

Apan sa pagbalik ni Sedro, wala na ang tawo. Unya dihay iyang gikasulti nga Traffic Aide ug sa iyang pakigsulti.

"Bay, asa na kadtong tawo nga sa akong pagkakita kaniya, naa siya mag-trabaho sa basurahan?" pangutana ni Sedro sa Traffic Aide. "Kadto ganing tawo nga manguykoy lang diha sa basura?"

"Aw! Oo Bay. Nakakita ako kaniya," tubag sa Traffic Aide. "Kadto ganing kanunay magdala-dala og sako ug pikoton og mata."

"Oo, Bay. Asa man siya karon. Gusto ko lang unta ko nga makigsulti kaniya."

Giasoy sa Traffic Aide nga gikuha kini sa turistang Hapon. Naluoy kaniya ang Hapon kay kuno, ang hitsura niini mora gayod kuno og hitsura sa iyang amahan didto sa Japan.

Naluoy kadtong turistang Hapon sa maong tawo hinungdan nga gipasaligan kini nga dad-on siya didto sa nasud sa Japan. Ang tawo, naila nga si Damaso ug karon naa siya ubos sa pagkustodiya sa DSWD samtang gihikay pa ang papeles niini paingon sa Japan. Kadtong turista nga Hapon ang migasto sa tanang papeles. Mihatag man gani ang turistang Hapon sa tanang kuwarta nga gikinahanglan.

Matud pa sa taga DSWD, masuwerte kuno si Damaso ug segurado nga dili na ikaw makaila kaniya kun magkita kamo pag-usab.

Human sa pakighinabi ni Sedro sa Traffic Aide, nakahukom na siyang mopauli paingon sa bukid. Ug sa kaugalingon hunahuna ni Sedro nga mas maayo na lang nga gikuha sa turistang Hapon si Damaso kay kun wala pa, dili unta niya mahimamat ang turistang Hapon nga maoy naghatag og suwerte sa iyang kinabuhi. (Kataposan)