Kilometro 35

Gula 6

“Orville....! Milanog ug mialingawngaw ang akong tingog sa awaaw nga dapit sa Kilometro 35 samtang nagtan-aw kang Orville nga mihagba sa yuta human naigo sa pagpusil ni Sheldon kaniya.

Gusto kong moduol sa akong boyfriend apan gipugngan ko’g maayo ni Ervin pinaagi sa pagbinaklid sa akong mga kamot nga iyang gigunitan.

“Hayop ka, Sheldon!” Mibanghag ko ngadto sa salbahis nga maoy mipusil sa akong boyfriend. “Magbayad ka sa imong gibuhat kang Orville.”

“Way makapangahas pagpaningil nako, Sandra,” nagkanayon si Sheldon.

Sa akong tan-aw, morag wala na maglihok si Orville didto sa yuta nga iyang nahagbaan duol gayod sa sementong kilometrohan sa Kilometro 35. Gusto ko siyang tabangan apan dili ko makahimo. Wala gyud molugak ang kahugot sa paggunit ni Ervin nako.

“Ikarga ninyo siya sa sakyanan,” mando ni Sheldon sa iyang mga barkada nga pulos mga adik.

Dihadiha, gawas kang Ervin nga daan nang naggunit nako, mitabang sab sa paggunit nako sila si Kurt ug Keith. Gipugos ko nila’g dala sa nahimutangan sa ilang gisakyan. Misulay ko’g lugnot ug kisikisi pero dili gyud nako mapiog ang ilang kusog.

“A-asa ko ninyo dad-a?” Wala ko’y gitumong sa akong pangutana dihang gipalingkod na ko nila sa ikaduhang lingkoranan sa Toyota Lite Ace van.

Gitaliwad-an ko nila ni Keith ug Kurt.

“Masayran mo ra unya kun atua na kita sa dapit nga among dad-an kanimo,” si Sheldon ang mitubag kinsa kadali rang nakapahimutang sa iyang kaugalingon sa lingkoranan atubangan sa manibela.

Dihang nakapahimutang na ang tanan, gipadagan ni Sheldon ang sakyanan. Wala ko makasabot sa akong gibati samtang nagkalayo kami sa Kilometro 35 diin nahibilin si Orville nga gipusil ni Sheldon.-- Sumpayan pa