Kilometro 35

Gula 4

Morag saging nga gituba si Sheldon nga nihagba sa sementong karsada human naigo sa makusog nga kinumo ni Orville. Ang nahitabo kang Sheldon nakapahinumdom nako sa pagka-knockout ni Ricky Hatton sa mga kamot ni pound-for-pound boxer Floyd Mayweather, Jr. sa ilang panagsangka niadtong Disyembre, 2007. Kusog gyud ang kinumo ni Orville nga nakaigo kang Sheldon kay nalakum-og man kini.

Apan sa wala pa makabangon si Sheldon, gidasmagan na si Orville sa iyang mga barkada. Misukol si Orville sa unom ka mga higala ni Sheldon. Nakatilaw sa kasakit sa iyang sumbag ug patid ang unom. Pero dihang nagunitan na nila si Orville, wala nay dag-anan ang akong boyfriend. Gitabangan nila kini’g kulata hangtod nga nabun-og na siya’g maayo.

“Igo na!” Nakasinggit ko kay bisan ang suga lang sa headlight sa sakyanan ang naghatag og kahayag sa dapit apan nakita ko nga nagkadugo na ang baba ug ilong ni Orville. “Husto na...!”

Apan ingon sa wala ako mabati sa mga barkada ni Sheldon nga mipadayon pagkulata kang Orville. Tungod sa gibati kong kaluoy sa akong boyfriend nga nabun-og na pag-ayo, miduol ko ug gigunitan si Verle nga usa sa mikulata kaniya. Gusto kong pugngan si Verle apan kusganon siyang misawilik nako. Diriyot ko malamba sa yuta kun wala pa ko masagang ni Sheldon nga nakabangon na gikan sa iyang pagkalukapa.

“Sheldon, please,” nagpakiluoy ko niya. “Badlonga ang imong mga barkada. Bun-og na kaayo si Orville!”

“Kuwang pa ang nadawat nga bun-og sa imong boyfriend, Sandra,” ni Sheldon nga daw nagkagot ang mga ngipon.

“U-unsay buot mong ipasabot?” Gipangutana ko siya.

Wala motingog si Sheldon. Gilanit hinuon niya ang armas gikan sa iyang hawakan. Unya milanog ang sipang buto! -- Sumpayan pa