Gula 165
Sa tuyo nga madali ang among kasal, mihangyo si Ferdinand ngadto ni Rev. Amelia Mangubat nga dili na lang mi mopailawom sa seminar.
“Kamoy mag-igo,” matud ni Rev. Mangubat. “Ang sabot namo ni Mr. Dee mao nga sundon ang inyong gusto.”
“Amo na lang bayran ang bahin sa seminar, Reverend,” gikan ni Ferdinand. “Ug ang gastohanan sa tanang papeles.”
“Kami na si Mr. Dee ang magsabot bahin sa bayad,” tubag sa solemnizing officer. “Duna lang ko’y ipahinumdom ninyo.”
“Unsa man kana, Reverend?” Sukit ni Ferdinand.
“Basin magtuo mo nga mini ang pagahimuon kong kasal, ha,” ni Reverend Mangubat pa. “Genuine baya ni. I-record ni sa NSO. Busa, dili kini ninyo katiawtiawan.”
“Nasayod mi niana, Reverend,” matud ni Ferdinand.
Unya giinstruksiyonan sa solemnizing officer si Ferdinand kun unsay angay niyang buhaton. Gipasabot siya ni Rev. Mangubat kun unsay angay niyang andamon. Unya gi-schedule dayon ang among kasal nianang pagka Lunes sa buntag. Sa Manila City Hall lang gihapon ang venue sa kasal.
Paggawas namo sa opisina ni Rev. Mangubat, mipara si Ferdinand og taxi. Misakay mi ug nagpahatod ngadto sa among gipuy-an sa Alabang.
“Nganong nag-Kuya ka man kang Mr. Dee?” Gipangutana ko si Ferdinand samtang nagdagan ang taxi nga among gisakyan dihang nahinumdom ko sa akong nadungog samtang nagsultihanay siya ug ang iyang amo sulod sa opisina niini.
“Iya nang gusto,” mipasabot si Ferdinand. “Sa sinugdan, nag-Sir ko niya. Pero gipausab niya ang akong pagsangpit niya kay pormal ra kuno ang Sir. Siya’y nagbuot nga Kuya ang akong itawag niya aron kuno mas suod nga paminawon.”
“Buotan gyud diay ang imong amo, no?”
“Kaayo. Maong gibugtian ko sab siya sa maayo kong pagserbisyo.”
“Siya’y moabaga sa tanang galastohan sa atong kasal, no?”
“Oo. Iya nang saad nako...nga basta magminyo ko, siya’y bahala sa tanang galastohan.”
“Mao diay nga kursonada ka kaayong makigminyo nako. Nagsalig diay ka kay may financier ka man.”
May isulti pa unta si Ferdinand dihang kalit mipiliik ang brake sa taxi nga among gisakyan. -- Sumpayan pa