Gula 3
Gikulbaan ko dihang nahiduol na sa nahimutangan namo ni Orville si Sheldon ug ang unom niya ka barkada. Ila ming gilibotan.
“Nganong nia man mo ning awaaw nga dapit?” Nangutana si Sheldon nga nanighawak sa atubangan namo ni Orville. “Nag-date mo dinhi?”
Wala ko motubag sa pangutana ni Sheldon. Si Orville nagpakahilom lang sab. Misamot ang kakulba sa akong dughan.
“Wa tingali sila’y ikabayad sa hotel, Sheldon,” may tuno sa pagbugalbugal ang sinultihan ni Kurt. “Maong nia lang sila magmantinil sa kasa...kasagbotan!”
Unya nangatawa silang tanan.
“Tana, Orville,” gigunitan ko ang kamot sa akong boyfriend kay gusto kong makapalayo na gikan kang Sheldon ug sa iyang mga barkada. “Mamiya na kita ning dapita.”
“Opss,” ni Sheldon pa nga migunit sa usa nako ka bukton. “Ayaw una mo’g biya kay makigsulti pa ko ninyo. Di ba nipara man mo sa among gisakyan? Unya karon inyo ming biyaan.”
“Nasayop lang mi sa pagpara,” maoy akong tubag. “Gipakaingon namo’g trak nga depasahero ang nagsingabot. Wa mi magtuo nga kamoy among maparahan.”
Unya gisulayan nako’g wakli ang kamot ni Sheldon nga migunit sa akong bukton. Pero gihugtan hinuon ni Sheldon ang paggunit sa akong bukton. Nasakitan ko’g diyotay ug kini namatikdan ni Orville.
“Buhii si Sandra, Sheldon,” badlong ni Orville.
Dihang wala mopatuo si Sheldon, kalit lang milupad ang tuong kinumo ni Orville. Maayong pagkaigo sa apapangig ni Sheldon ug nalukapa kini. -- Sumpayan pa