Sukli sa utang

Gula 164

Dihadiha gikab-ot ni Mr. Dee ang awditibo sa telepono nga gipahimutang sa lamesa sa iyang atubangan. Midayal siya’g mga numero. Pagkataudtaod, dihay iyang gikasulti. Namati lang mi si Ferdinand.

Sa akong pagsabot samtang naminaw sa pagpakigsulti ni Mr. Dee sa tawo nga didto sa pikas tumoy sa linya sa telepono, morag ang giingon niyang Rev. Amelia Mangubat ang iyang gipakigsultihan.

“Mangayo unta ko’g gamay’ng pabor nimo, Kumadre,” mao kini gisulti ni Mr. Dee kun sa Binisaya pa kay gitinagalog man niya ang iyang pagpakigsulti sa tawo nga didto sa pikas tumoy sa linya sa telepono. “Naa koy tawo diri nga nagkinahanglan sa imong serbisyo. Gusto nang magminyo. Magpatabang unta ko nimo aron madali ang ilang kasal...Oo, sa civil lang una...pero isunod dayon ang sa simbahan...Ako nay bahala sa tanan niyang obligasyon nimo... salamat daan, Kumadre.”

Dihang gibutang na ni Mr. Dee ang awditibo sa telepono, si Ferdinand na usab ang iyang gipakigsultihan.

“Okey na,” nagkanayon si Mr. Dee, “Pakigkitai na lang ninyo si Rev. Amelia Mangubat aron ma-process dayon ang mga papeles nga gikinahanglan sa inyong pagpakasal. Igo na lang god mong mopirma didto sa tanang mga pirmahanan. Naa sa basement sa Manila City Hall ang office ni Rev. Mangubat.”

“Salamat, Kuya,” ni Ferdinand pa.

“Daghang salamat, Sir,” nako pa usab.

“Way sapayan,” mapahiyomong nitubag si Mr. Dee.

Nanggawas dayon mi sa buhatan ni Mr. Dee. Nanakay mi’g taxi ug nagpahatod ngadto sa Manila City Hall. Wala mi maglisod pagtultol sa buhatan ni Rev. Amelia Mangubat. Ilado diay siya kaayo isip usa ka solemnizing officer. Siya’y sagad duolon sa mga managhigugmaay nga gustong magpa-secret marriage ug sa tanan nga gustong magpa-civil marriage.

Dihang gikaatubang na namo si Rev. Mangubat, misugod dayon siya pagsukit-sukit namo ni Ferdinand.

“Unsa man ang inyong gusto?” Mao kini pangabling pangutana ni Rev. Mangubat. “Dinalian nga kasal?”

“Kun mahimo unta, Reverend,” si Ferdinand ang mitubag.

“Duna ra bay tulo ka adlaw nga seminar,” matud sa solemnizing officer nga mipasiplat nako. “Importante kaayo nga mo-undergo mo niini.”

Nagkatinutokay mi si Ferdinand. -- Sumpayan pa