Nakapanglingo si Lucio nga mipasiklap sa halapad nga hunasan sa Kinawahan ning buntaga. Gihugpaan kini sa panon sa manginginhas. Sama usab sila kaniya nga namasin nga makakinhas diha sa mga lim-aw sa hunasan, sa bisan unsang matang sa kinhason nga libreng ikasula sa mga lagutmon ug binuyok nga kan-on.
"Tay, daghana imo kuha kinhas, ha? Suwa ta kan-on...!" panugon ni Boyet kaganiha, ang bugtong anak nila ni Cita nga mitungtong na sa 6 anyos ug mag-Grade One na sa ting-abli sa klase, sa dihang mikanaog si Lucio sa ilang balay. Kaadlawon siya nga migikan sa ilang balay aron sa pagpanginhas.
Panguma ang panginabuhian ni Lucio sa ilang baryo sa Libaong. Apan naandan niya nga manginhas gayud og kausa sa usa ka semana, bisan kun lima ka kilometro ang gilay-on sa baybayon gikan sa Libaong ngadto sa Kinawahan.
"Syo, usa naman lang diay ka semana ang paabuton, Pasko na sab! Apiki man gihapon ta. Wa man gyud tay kuwartang ikapamasko niini! Kanunay man ta nga gipigis sa kawad-on matag Pasko...!" mao usab kini ang gituaw ni Cita sa iyang paggikan sa ilang balay, kaganihang kaadlawon. Nag-antos gyud intawon ang iyang asawa sa ilang kakabos.
"Tay, daghan na Pasko agi...! Wa man gyud ko nimo paliti duwaan!" laing pahungaw ni Boyet ngadto kang Lucio kaganiha. Nagtubo usab ang iyang anak sa kaapiki sa ilang kahimtang ni Cita.
Paspas ang pamasin nga pagpanginhas ni Lucio sa mga lim-aw-lim-aw sa hunasan. Gisalig-ay niya sa abaga ang dalang bukag. Way nahamisik sa iyang pagpunit sa nakit-an niyang matang sa mga bat, kasag, litub, mulbog ug suwaki. May pipila ka tama'a usab siyang nakuha, pinaagi sa pagbutang og dinukdok nga tabako sa mga lungag niini diha sa hunasan.
Unya, kalit nga may nasindulan ang mga tiil ni Lucio sa balas sa hunasan. Usa ka pitaka! Gipunit niya ang umog pa nga pitaka nga nagkabalas. Bagal ang maong pitaka. Giukban niya. Nahasiga ang mga mata ni Lucio. Pastilan, naghuot sa tibuok nanampiling ni Ninoy ang sulod sa pitaka. Iyang giihap ang umog-umog pa gihapon nga mga papel debanko. Sus, 20 ka buok tag kinintos pesos...!
Nagkalingilingi si Lucio sa hunasan. Nakasinggit siya sa tumang kalipay nga mibiya dayon sa hunasan. Sa sidlakan, miginting na ang haring adlaw, ug mikuyanap na ang bidlisiw sa kabuntagon sa tibuok palibot sa hunasan.
Yahooo! Yahooo....! Mahinayon na gayud ang Pasko...!"