Mausab ang hitsura atol sa kilomkilom

Ang iya rang inahan ug amahan ni Zandro ang nahibawo nga mausab ang iyang nawong inig abot sa kilomkilom. Mao kini karoy naghatag og kahasol ni Zandro. Kaniadto sa bata pa siya inig kausab sa iyang nawong mohilak siya taman sa ginhawa ug moundang lang siya kun gakson siya sa iyang inahan nga si nanay niya Petra.

Ug alang kang Zandro usa kini ka tinagoan nga dili gyud angay’ng mahibaw-an sa uban. Ug karon nga ulitawo na siya mora’g kanunay siyang pangulbaan nga dili siya buot nga mahibawo ang iyang uyab nga si May Ann. Kay oras nga mahibawo kini segurado gyung buwagan siya niini.

“Nganong ingon man ko ini, Nay Petra, tay Omeng?” Usa ka gabii dihang nahimo na usab siyang laksot, nangutana siya sa iyang mga ginikanan. “Unsa man, may kaliwat tang mga ungo?”

“Ha, kanang...kuan, Dong Zandro, wa-wa man,” nagbungabunga si nang Petra pagtubag.

“Petra, sultihi na lang si Zandro, Petra, nga...nga,” iyang giingnan si Petra.

“Kay ngano man diay, Nay, Tay, unsa man diay buot ninyong isulti nako, unsa man may gitago mo nako?” kahilakon si Zandro. “Usahay ra ba, inig kausab sa akong nawong, morag ganahan ko’g tawo, gusto ko nang mamugno ug unya lami kaayong isuyop og dugo...”

Nagtinutokay sila si Petra ug Omeng. Unya si Petra ang mibuak sa kahilom nga miulang tali kanilang tulo.

“Zandro, ang imong Lola Masay, usa ka mangtas nga ungo, ug ako nga anak usa usab ka ungo,” may mga luha ang mga mata ni Petra.

“Ti-tinuod ba ning akong nadungog, Nay, Tay? Ikaw, Tay Omeng ungo sab ka? mitan-aw si Zandro sa amahan.

“Oo, anak. Kaming duha si nanay nimo Petra puwerte nang ungoa, ug motokar lang ni inig abot sa alas dose sa gabii, dili parehas nimo nga matag abot sa kilomkilom anha pa motukar,” ni Omeng.

“Unsaon na man ni ron, nga nagsabot ra ba mi si May Ann nga magpakasal na. Segurado gyung iya kong biyaan kun mahibawo siya nga kita kaliwat og mga ungo, mga mangtas nga ungo...” ug mihilak si Zandro.

Pagka ugma sa buntag nagkita sila si May Ann ug giimbitar siya niini nga moadto sa ilang balay kay birthday sa amahan niini. Ug mao kini karoy iyang problema kay matag gabii mahimo siyang ungo ug hangtod na kini sa alas dose sa gabii. Sangko sa langit ang kaguol karon kay lagi mahal ug gihigugma niya si May Ann. Kun dili siya moadto sa balay niini segurado gyung mahiubos kini kaniya kay ipailaila ra ba siya sa amahan niini ug kinahanglan gyud nga moadto siya sa birthday sa iyang amahan ni May Ann.

Tuod, pagka kilomkilom, nahimo na usab siyang ungo. Laksot na kaayo siya. Ug nakahukom siyang dili na lang moadto sa ilang May Ann. Ug kay nakalupad na man siya, didto siya magpatungod sa balay nila ni May Ann ug nakugang siya kay mao may iyang nakita si May Ann nga diha sa may balkonahe sa balay niini nga morag nagwarawara sa iyang mga kamot ug unya kalit lang nahimong Anananggal.

“Si...si May Ann, usa usab diay ka ungo,” niya pa sa hilom. Ug unya midayib si Zandro paingon sa nahimutangan ni May Ann. Ug unya milanog ang ilang mga tingog nga nagkanayon: “Kwiiii! Kwiiiiii! Wakkkkkk! Wakkkk! Tikwiiiiii!!! Wakkkkk!!! Wakkkk!” ug nagkuyog ang duruha paingon sa unahan. -- sa naglawod nga kangitngit sa kagabhion. (Kataposan)