Sukli sa utang

Gula 158

Ang gipuy-an ni Ferdinand usa ka condominium unit nga nahimutang dili layo sa usa ka dakong shopping mall sa Alabang, Muntinlupa City. Hamugaway ang unit nga iyang gipuy-an. Kompleto siya sa mga gamit sa sulod sa maong condo. Maila nga usa ka lalaki ang nagpuyo niini kun maoy basehan ang mga butang nga makita sa palibot ug ang pagkapahimutang sa mga gamit nga walay maayong arrangement.

“Nindot man diay ka’g pinuy-anan,” giingnan ko siya.

“Ang akong amo maoy tag-iya niini,” gipasabot ko niya. Gipapuyo lang ko niya dinhi nga libre. Aron kuno dili ko makagasto og dako.”

“Buotan diay kaayo ang imong agalon.”

“Kaayo. Mao bitaw nga nagdugay ko’g panrabaho sa iyang kompaniya.”

“Dugay ka na diay’ng nagtrabaho sa iyang kompaniya?”

“Oo. Sukad sa nag-edad pa ko’g disiotso. Di pa ko makamaong mo-drive niadtong panahona. Nakakat-on na lang ko’g drive sa kadugayan na nakong kuyog-kuyog sa delivery truck.”

“Dili kaha masuko ang imong amo nga nagdala ka’g babaye dinhi?”

“Wa kay angay kabalak-an mahitungod niana. Dili estrikto ang akong amo. Sigehan man gani ko niya’g apura nga magminyo na aron may makaatiman na nako ug dili na ko mag-inusarag puyo dinhi sa akong condo unit.”

Wala na ko motubay sa gisulti ni Ferdinand. Pero nalipay ko sa iyang gipamulong kay akong nasuta nga pabor kini kanako.

Misulod mi sa kuwarto ug iyang gipahimutang ang akong mga gamit. Hamugaway sab ang iyang katulganan. Puyde kaayo alang sa duha ka tawo kay pang-double man ang kama niini.

“Okey ra ba nimo ang akong gipuy-an?” takulahaw lang nangutana si Ferdinand.

“Okey kaayo,” dali ra kong nakatubag. “Nakagusto ko dinhi. Nindot ang atmosphere.”

Wala na motingog si Ferdinand. Namatikdan kong mitutok siya nako. Unya, sa wala lang tuyoa nahitutok sab ko niya. Taudtaod gayod ang pagbag-iray sa among mga tinan-awan. Makahuloganon ang among tinutokan sa usag-usa. Mora’g dunay gisabotan ang among mga mata.

Unya, pagkilab sa mga gutling, mao na lamay akong naamgohan nga inanay nang nagkaduol ang among mga ngabil. Hangtod nga nagkaakob na gyud kini sa pinadulot nga hinagkanay. -- Sumpayan pa