Sukli sa utang

Gula 155

Tungod sa kalit nga kamatayon ni Davon, kalit lang sab kong nakahukom nga mobiya na sa apartment nga among gipuy-an. Wala nay rason nga magpabilin ko’g puyo sa maong apartment kay wala na man siya.

Dili ko makalahutay og puyo sa maong apartment nga wala si Davon kay igoigo ra man ang kuwarta nga iyang gibilin nako. Wala na koy ikaabang sa apartment sa sunod bulan. Mao nga kinahanglang mobiya na ko sa apartment sa labing daling panahon.

Gipanghipos dayon nako ang akong mga gamit. Ang tanang importanteng dad-on gisulod nako sa bag. Pagkahuman, gitawgan nako si Ferdinand. Gibuligan ko sa Kahitas-an kay nagkasulti dayon mi.

“Nagkinahanglan ko sa imong tabang,” gidiretso nako ang akong tuyo kang Ferdinand.

“Ngano man?” Nakapangutana siya. “May problema ba?”

“Aduna. Pero unya ko na ikaw pasabta sa tanan kun magkita na kita.”

“O, sige. Asa man ta magkita?”

“Sa gawas nga bahin sa simbahan sa Baclaran.”

“Unsang orasa?”

“Mga 4:30 kun okey ra nimo.”

“Sige. Magkita ta didto.”

Human kami magkasabot, gibutang na nako ang telepono. Sa makadiyot nakapamalandong ko. Ingon sa paspas ra kaayo ang dagan sa mga panghitabo sa akong kinabuhi ug daw kalit lang nausab ang tuyok sa akong kalibotan.

Mibiya na ko sa apartment human sa paniudto. Dala na nako ang tanan kong mga gamit. Nahinugon ko sa mahalong mga gamit sa panimalay ni Davon nga nahibilin sa apartment apan wala na koy panahon sa pagpanghipos niini. Bahala na ang tag-iya sa apartment nga mohipos niadto sa higayon nga iyang masusihan nga wala nay nagpuyo sa maong unit. Total, dili man sab akoy tag-iya sa maong mga appliances.

Kay sayo pa man sa kahaponon, nagpabugnaw una ko sulod sa usa ka shopping mall sa Baclaran. Dihang alas 4:15 na, migawas ko sa mall ug mipaingon ngadto sa atubangang bahin sa simbahan diin adto kami mag-abot si Ferdinand segon sa among gikasabotan.

Wala ko magdugay sa pagpaabot kang Ferdinand. Untop alas 4:30 nahiabot siya. Nagtingsi siyang nagpaingon sa akong nahimutangan. Gibati ko ang tumang kahinangop pagkakita kaniya. -- Sumpayan pa